លោក Herman Van Rompuy,ប្រធាននៃសហភាពអឺរ៉ុប
© AFP/Georges Gobet
ក្នុងខណៈដែលសមាគមអាស៊ានគ្រោងបើកកិច្ចប្រជុំនៅថ្ងៃ ទី២២កុម្ភៈនេះដើម្បីដោះស្រាយបញ្ហាកម្ពុជាថៃ សភាអឺរ៉ុបបានចេញដំណោះស្រាយមួយអំពីបញ្ហានេះដែរ។ នៅក្នុងដំណោះស្រាយបញ្ហាព្រំដែនខ្មែរនិងថៃចុះថ្ងៃទី១៧កុម្ភៈ សភាអឺរ៉ុបបានរំលឹកដោយយោងតាមសាលក្រមតុលាការក្រុងឡាអេឆ្នាំ១៩៦២ ថា ប្រាសាទព្រះវិហារស្ថិតក្នុងដែនអធិបតេយ្យរបស់កម្ពុជា និងបានអំពាវនាវឱ្យកម្ពុជានិងថៃគោរពតាមសាលក្រមនេះ។ សភាអឺរ៉ុបក៏បានថ្កោលទោសចំពោះការផ្ទុះអាវុធដាក់គ្នារវាងកម្ពុជា និងថៃ និងអំពាវនាវឱ្យភាគីទាំងពីររកដំណោះស្រាយបញ្ចប់ជម្លោះនេះដោយឈាន ទៅរកកិច្ចព្រមព្រៀងសន្តិភាពមួយ។
សេចក្តីសម្រេចស្តីពីដំណោះស្រាយបញ្ហាព្រំដែនកម្ពុជានិងថៃរបស់សភា អឺរ៉ុបបានលើកឡើងអំពីការបាត់បង់ជីវិតរបស់ប្រជាពលរដ្ឋទាំងសងខាង និងបានសម្តែងការអាណិតអាសូរចំពោះពលរដ្ឋជាច្រើនទៀតដែលបានភៀសសឹក នៅពេលដែលមានការប្រយុទ្ធគ្នា។ ម្យ៉ាងទៀត ស្ថានភាពអាក្រក់នៅតាមព្រំដែនកម្ពុជាថៃជាការគំរាមដល់សន្តិភាព និងស្ថិរភាពក្នុងតំបន់។ សភាសហភាពអឺរ៉ុបក៏បានសម្តែងការព្រួយបារម្ភយ៉ាងខ្លាំងដែរចំពោះ ព័ត៌មានដែលថាមានការប្រើប្រាស់គ្រាប់បែកចង្កោមនៅក្នុងពេល ប្រយុទ្ធគ្នានោះ។
សភាសហភាពអឺរ៉ុបបានលើកឡើងថា ប្រាសាទព្រះវិហារដែលជាសម្បត្តិបេតិកភណ្ឌរបស់ពិភពលោកបានទទួលរង ការបំផ្លិចបំផ្លាញដោយសារការបាញ់គ្រាប់ផ្លោងនៅពេលប្រយុទ្ធគ្នា។ ដោយហេតុថា សហគមន៍អន្តរជាតិមានទំនួលខុសត្រូវចំពោះការអភិរក្សប្រាសាទដែលបាន ចុះក្នុងបញ្ជីអង្គការយូណេស្កូ សភាសហភាពអឺរ៉ុបបានអំពាវនាវឱ្យភាគីជម្លោះទាំងពីររកដំណោះស្រាយ បញ្ចប់ជម្លោះតាមរយៈការចរចាគ្នាដោយទទួលយកជំនួយពីសមាគមអាស៊ាន និងអង្គការសហប្រជាជាតិ។
សភាអឺរ៉ុបបានរំលឹកថា សាលក្រមតុលាការយុត្តិធម៌អន្តរជាតិក្រុងឡាអេឆ្នាំ១៩៦២បានកាត់ សេចក្តីថាប្រាសាទព្រះវិហារស្ថិតក្នុងដែនអធិបតេយ្យរបស់កម្ពុជា និងបានអំពាវនាវឱ្យកម្ពុជានិងថៃគោរពសាលក្រមនេះ និងឈានទៅរកកិច្ចព្រមព្រៀងសន្តិភាពមួយនៅតំបន់ព្រំដែននិងនៅ តំបន់ព្រះវិហារ។ សភាអឺរ៉ុបក៏បានស្វាគមនដល់ការសម្រេចរបស់អង្គការយូណេស្កូក្នុងការ បញ្ជូនបេសកជនពិសេសដើម្បីមកវាយតម្លៃការខូចខាតប្រាសាទព្រះវិហារ។
មន្ត្រីរដ្ឋាភិបាលមិនអាចទាក់ទងសុំប្រតិកម្មបានទេនៅថ្ងៃនេះ ប៉ុន្តែដំណោះស្រាយរបស់សភាអឺរ៉ុបហាក់ដូចជាស្របគ្នាទៅនឹងអ្វី ដែលរដ្ឋាភិបាលកម្ពុជាចង់បាន។ លោកនាយករដ្ឋមន្ត្រីហ៊ុន សែនបានដាក់ចេញសំណើ៤យ៉ាងទៅកាន់ប្រទេសថៃដើម្បីឱ្យមានកិច្ច ព្រមព្រៀងឈប់បាញ់គ្នាជាអចិន្ត្រៃយ៍មួយដោយមានការត្រួតពិនិត្យពី សមាគមអាស៊ាន។ ប៉ុន្តែ សំណើទាំងនោះត្រូវបានទាត់ចោលដោយភាគីថៃ។យ៉ាងណាក៏ដោយ កម្ពុជាគ្រោងប្តឹងតុលាការក្រុងឡាអេឱ្យបកស្រាយឡើងវិញនូវសាលក្រម ឆ្នាំ១៩៦២ដូចដែលសភាអឺរ៉ុបបានលើកឡើង៕
No comments:
Post a Comment