កម្ពុជា ស្នើឲ្យមានកិច្ចព្រមព្រៀងឈប់បាញ់ នៅព្រំដែនព្រះវិហារ
លោក ហ៊ុន សែន ធ្វើសន្និសីទកាសែត ថ្ងៃទី ១៧ កុម្ភៈ ២០១១
© Reuters
ដោយបញ្ចេញប្រតិកម្មចំពោះការដណ្តើមពាក្យថា ជោគជ័យ របស់ថៃ លើសមរភូមិការទូត នៅកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ នៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានប្រកាសនូវជំហរកម្ពុជា សម្រាប់តុប្រជុំចរចាថ្នាក់រដ្ឋមន្ត្រីការបរទេសអាស៊ាន នាថ្ងៃ២២កុម្ភៈខាងមុខ។ នោះគឺកម្ពុជា ស្នើឲ្យមានកិច្ចព្រមព្រៀងឈប់បាញ់ជាស្ថាពរ និងជាអចិន្ត្រៃយ៍ ដែលចុះហត្ថលេខាដោយរដ្ឋមន្ត្រីកម្ពុជា និងរដ្ឋមន្ត្រីថៃ ព្រមទាំងមានអាស៊ានជាសាក្សី។ ជាមួយគ្នានោះ ក្នុងសន្និសីទកាសែតដ៏កម្រមានពីមុនមក លោកនាយករដ្ឋមន្ត្រី ហ៊ុន សែន ក៏បានប្រកាសប្តឹងទៅតុលាការយុត្តិធម៌អន្តរជាតិ ដើម្បីបកស្រាយសាលក្រម ឆ្នាំ១៩៦២ លើសំណុំរឿងព្រំដែនប្រាសាទព្រះវិហារផងដែរ។
លទ្ធផលនៃកិច្ចប្រជុំ កាលពីថ្ងៃទី១៤កុម្ភៈ រួមទាំងការប្រគល់តួនាទីអាស៊ាន បើកកិច្ចប្រជុំ លើជម្លោះព្រំដែនកម្ពុជា-ថៃ នៅថ្ងៃ២២កុម្ភៈខាងមុខ ត្រូវបាននាយករដ្ឋមន្ត្រី និងរដ្ឋមន្ត្រីការបរទេសថៃ បកស្រាយតាមកាសែតថា ជាជោគជ័យ និងជាការទាមទាររបស់ក្រុងបាងកក។
ក៏ប៉ុន្តែនៅព្រឹកមិញ លោកនាយករដ្ឋមន្ត្រី ហ៊ុន សែន បានច្រានចោល ហើយអះអាងថា ថៃនិយាយបំផ្លើសការពិត។ តាមពិតថៃបានព្យាយាមជំទាស់ មិនឲ្យមានការប្រជុំនៅក្រុមប្រឹក្សាសន្តិសុខអង្គការសហប្រជាជាតិ។ ថៃក៏មិនចង់ឲ្យក្រុមប្រឹក្សាសន្តិសុខចេញសេចក្តីថ្លែងការណ៍ណាមួយទេ។
តាមលោកនាយករដ្ឋមន្ត្រី ក្រុមប្រឹក្សាសន្តិសុខអង្គការសហប្រជាជាតិ បានកោះប្រជុំ កាលពីថ្ងៃទី១៤កុម្ភៈ ឆ្នាំ២០១១ ស្របតាមសំណើរបស់កម្ពុជា។ រីឯកិច្ចប្រជុំថ្នាក់រដ្ឋមន្ត្រីការបរទេសអាស៊ាន នៅថ្ងៃ២២កុម្ភៈ ក៏ជាបំណងរបស់កម្ពុជា ចាប់តាំងពីឆ្នាំ២០០៨ មកម្ល៉េះ។
មុនពេលរដ្ឋមន្ត្រីការបរទេសអាស៊ានបើកកិច្ចប្រជុំ នៅទីក្រុងហ្សាកាតា ប្រទេសឥណ្ឌូនេស៊ី នៅដើមសប្តាហ៍ក្រោយ នៅថ្ងៃនេះ លោកប្រមុខរដ្ឋាភិបាល ហ៊ុន សែន បានប្រកាសថា កម្ពុជាស្នើឲ្យមានការចុះហត្ថលេខាលើកិច្ចព្រមព្រៀងឈប់បាញ់ រវាងរដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសថៃ ដោយមានអាស៊ាន ជាសាក្សី។
កិច្ចព្រមព្រៀងឈប់បាញ់ នៅតំបន់ព្រំដែនព្រះវិហារ មាន ៤ ចំណុច។ ទី១-ភាគីកម្ពុជា និងថៃព្រមព្រៀងគ្នាឈប់បាញ់ជាស្ថាពរ និងជាអចិន្ត្រៃយ៍។ ទី២-រក្សាស្ថានភាពដដែល នៃទីតាំងឈរជើងនៃកម្លាំងរៀងៗខ្លួន មិនចល័តទ័ព និងមិនបំពានគ្នា រង់ចាំរហូតដល់មានដំណោះស្រាយជាស្ថាពរលើការបោះបង្គោលកំណត់ព្រំដែន។ ចំណុចទី៣-ភាគីទាំងពីរ លើកទឹកចិត្តឲ្យមេបញ្ជាការ នៅជួរមុខ នៅសមរភូមិ ពិភាក្សាសហការគ្នា ដើម្បីរក្សាស្ថិរភាពនៅតាមព្រំដែន និងចំណុចទី៤-ដើម្បីធានាប្រសិទ្ធិភាពនៃបទឈប់បាញ់ ភាគីទាំងពីរ ស្នើសុំឲ្យមានការត្រួតពិនិត្យបទឈប់បាញ់ ដោយបណ្តាប្រទេសអាស៊ាន។
តាមលោកនាយករដ្ឋមន្ត្រី អាស៊ាន គ្រាន់តែមិនឲ្យមានការបាញ់ប្រហារប៉ុណ្ណោះ។ តែ ដំណោះស្រាយពិតលើជម្លោះព្រំដែនកម្ពុជា-ថៃ ត្រូវដោះស្រាយនៅតុលាការអន្តរជាតិទីក្រុងឡាអេ។ កម្ពុជាក៏នឹងប្តឹងទៅកាន់តុលាការយុត្តិធម៌អន្តរជាតិនេះ ដើម្បីសុំឲ្យបកស្រាយនូវសាលក្រមឆ្នាំ១៩៦២ លើសំណុំរឿងប្រាសាទព្រះវិហារ។ ជាសាលក្រម ដែលពាក់ព័ន្ធនឹងផែនទីដងរែក ដើម្បីបែងចែកដែនដីកម្ពុជា និងទឹកដីថៃនៅព្រះវិហារ៕
No comments:
Post a Comment