ថ្ងៃ ព្រហស្បតិ៍ ទី ១៧ ខែ កុម្ភៈ ឆ្នាំ ២០១១
(រូបថត ចាន់ថេត)
ខេត្តកំពង់ចាម ៖ នាព្រឹកថ្ងៃទី១៧ កុម្ភៈ ២០១១ នៅសាលាបឋមសិក្សាគ្រញូង ឃុំវាលម្លូ ស្រុកពញាក្រែក បានរៀបចំពិធីសម្ពោធអគារសិក្សាថ្មី២ខ្នង មាន១០បន្ទប់ ជាអំណោយរបស់មូលនិធិក្លឹបសន្តិភាពអន្តរជាតិជប៉ុន និងក្រុមហ៊ុនអេ ជេ ស៊ី ក្រោមអធិបតីភាពដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងលោកជំទាវ។
លោកឡុង ធាម អភិបាលស្រុកពញាក្រែក បានថ្លែងគូសបញ្ជាក់ថា សាលាបឋមសិក្សាគ្រញូងនេះមានផ្ទៃដី១,២០ហិកតា បានចាប់ផ្តើមកកើតនៅឆ្នាំ១៩៦៨ ដំបូងឡើយមានតែអគារសិក្សា១ខ្នង ស្មើ៣បន្ទប់តែប៉ុណ្ណោះ ហើយត្រូវបានបំផ្លិចបំផ្លាញស្ទើរតែទាំងស្រុកទៅវិញនៅក្នុងសម័យសង្គ្រាមឆ្នាំ១៩៧០ ដល់ឆ្នាំ១៩៧៥ និងនៅក្នុងរបបគ្រប់គ្រង៣ឆ្នាំ ៨ខែ ២០ថ្ងៃ របបប្រល័យពូជសាសន៍ប៉ុល ពត។
លោកអភិបាលស្រុកពញាក្រែកបានបន្តថា នៅក្រោយថ្ងៃរំដោះ៧មករា ១៩៧៩ ប្រជាពលរដ្ឋ សប្បុរសជនជិតឆ្ងាយ និងរដ្ឋអំណាចមូលដ្ឋានបានរៀបចំទីតាំងសាលាបឋមសិក្សាគ្រញូងឡើងវិញ កសាងបានអគារសិក្សា១ខ្នង ៣បន្ទប់ ធ្វើអំពីបេតុងប្រក់ក្បឿង។ បន្ទាប់មកនៅឆ្នាំ២០០៦ ដោយមើលឃើញនូវការខ្វះខាតអគារសិក្សា និងការកើនឡើងចំនួនសិស្សកាន់តែច្រើនទើបមន្ទីរអប់រំ និងកីឡាខេត្ត សំរេចជួយកសាងបានអការសិក្សា១ខ្នង ៥បន្ទប់ ធ្វើអំពីបេតុងប្រក់ក្បឿង តាមរយៈកម្មវិថីសីលាខេត្ត។ សន្ទុះនៃការសិក្សារបស់កុមារា កុមារីនៅតំបន់នេះចេះតែមានកំណើនពីមួយឆ្នាំទៅមួយឆ្នាំ គួរឱ្យចាប់អារម្មណ៍នោះ និងមានការស្នើសុំពីប្រជាពលរដ្ឋ លោកគ្រូ អ្នកគ្រូនូវអគារសិក្សាផងនោះ ទើបសម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា និងលោកជំទាវបានគិតគូរសំរេចដោះស្រាយនូវអគារសិក្សាថ្មី២ខ្នង មាន១០បន្ទប់ និងបន្ទប់ទឹក៥ នៅសាលាបឋមសិក្សាគ្រញូង ព្រមទាំងអណ្តូងទឹកខ្នាតតូចចំនួន៤០អណ្តូង នៅក្នុងឃុំវាលម្លូ ស្រុកពញាក្រែក ដែលជាជំនួយឧបត្ថម្ភរបស់លោកអេអូយ៉ាម៉ាខាអូរុ និងលោកស្រីអេអូយ៉ាម៉ារ៉ូមិ ជាភរិយា ដែលជាប្រធាន និងអនុប្រធានក្លឹបសន្តិភាពអន្តរជាតិជប៉ុន សហការជាមួយលោកស៊ុន គឹមលី ប្រធានក្រុមហ៊ុនអេ ជេ ស៊ី ចំកាត់ ចំណាយទឹកប្រាក់សរុបអស់១៣១.៦០០ដុល្លារ ដែលបានចាប់សាងសង់ពីថ្ងៃទី៨ វិច្ឆិកា ២០១០ ហើយត្រូវបញ្ចប់នៅថ្ងៃទី២០ មករា ២០១១។
លោកអេអូយ៉ាម៉ាខាអូរុ ប្រធានក្លឹបសន្តិភាពអន្តរជាតិជប៉ុន ជាម្ចាស់អំណោយបានមានប្រសាសន៍ដោយបានគូសបញ្ជាក់ថា ប្រធានមូលនិធិក្លឹបសន្តិភាពអន្តរជាតិជប៉ុនបានផ្តល់ជាចំណងដៃ ដោយបានសាងសង់សាលារៀនចំនួន២ខ្នងថ្មីសន្លាង ស្មើ១០បន្ទប់ និងសមិទ្ធផលផ្សេងៗ រួមទាំងរថយន្តពន្លត់អគ្គីភ័យខ្នាតតូច២គ្រឿង ជូនសម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា។ សាលារៀននេះធ្វើឡើងដោយសេចក្តីស្រលាញ់រវាងប្រជាជនជប៉ុន និងប្រជាជនកម្ពុជា សូមថ្លែងអំណរគុណដល់បងប្អូនដែលបានអញ្ជើញចូលរួមនៅក្នុងកម្មវិធីនេះ។
បន្ទាប់មកសម្តេចអគ្គមហាពញាចក្រី ហេង សំរិន ប្រធានរដ្ឋសភាមានប្រសាសន៍ដោយថ្លែងគូសបញ្ជាក់ថា នាព្រឹកនេះមានសេចក្តីសោមនស្សរីករាយរួមជាមួយនឹងភរិយាដែលបានមកចូលរួមជាអធិបតីភាពក្នុងពិធីសម្ពោធអគារសិក្សាថ្មី២ខ្នង ព្រមទាំងសមិទ្ធផលនានាដែលទើបកសាងនៅក្នុងសាលាបឋមសិក្សាគ្រញូង ស្ថិតនៅឃុំវាលម្លូ ស្រុកពញាក្រែក។ សម្តេចបានបន្តថា សមិទ្ធផលទាំងនេះគឺជាអំណោយដ៏ថ្លៃថ្លារបស់ក្លឹបសន្តិភាពជប៉ុនអន្តរជាតិ និងក្រុមហ៊ុនអេ ជេ ស៊ី ចំកាត់ និងសប្បុរសជនផ្សេងៗទៀត មានលោកអេអូយ៉ាម៉ាខាអូរុ ជាប្រធានក្លឹបសន្តិភាព និងលោកស្រីអេអូយ៉ាម៉ារ៉ូមិ ជាអនុប្រធានក្លឹបសន្តិភាព លោកស៊ុន គឹមលី ប្រធានក្រុមហ៊ុនអេ ជេ ស៊ី ចំកាត់ជាម្ចាស់អំណោយដ៏ធំ។ ជាក់ស្តែងនៅឃុំវាលម្លូ ស្រុកពញាក្រែក សព្វថ្ងៃមានការអភិវឌ្ឍន៍ផ្លូវធំទូលាយ និងមានភ្លើងអគ្គិសនីប្រើប្រាស់ សាលារៀន និងវិស័យហេដ្ឋារចនាសម្ព័ន្ធផ្សេងៗទៀត។ បន្ទាប់មកសម្តេចពញាចក្រី ហេង សំរិន បានបំពាក់មេដាយមហាមេត្រីថ្នាក់មហាសេនាជូនសប្បុរសជនជប៉ុនផងដែរ៕
No comments:
Post a Comment