ថ្ងៃ អង្គារ ទី ១៥ ខែ កុម្ភៈ ឆ្នាំ ២០១១
រូបភាពពីវ៉េបសាយ
ប៉ាក់គីអាវ និងម៉ាកហ្គេសគ្រោងជួបគ្នាលើកទី៣ នៅខែវិច្ឆិកាខាងមុខ
យោងតាមលោកបប់ អារ៉ាំអ្នករៀបចំការប្រកួតរបស់ប៉ាក់គីអាវ និងជាប្រធានក្រុមហ៊ុនរៀបចំការប្រកួតនៅអាមេរិក Top Rank Promotionsបាននិយាយថា ខ្លួននឹងរៀបចំឲ្យមានការជួបគ្នាជាលើកទី៣រវាងកីឡាករចូអាន ម៉ានូអែល ម៉ាកហ្គេស និងម៉ានី ប៉ាក់គីអាវនៅខែវិច្ឆិកាខាងមុខ ។ ព័ត៌មាននេះអាចជាតន្រ្តីដ៏ពីរោះបំផុតសម្រាប់ត្រចៀករបស់ម៉ាក ហ្គេស ខណៈដែលកីឡាកររូបនេះបានរង់ចាំយ៉ាងអន្ទះសាចង់ជួបប្រកួតជាមួយ ប៉ាក់គីអាវ ជាលើកទី៣ ។
ម៉ាកហ្គេសបានស្វែងរកឱកាសជួបប្រកួតជា មួយប៉ាក់គីអាវចាប់តាំងពីឆ្នាំ២០០៨មកម្លេះពោលគឺ៤ឆ្នាំបន្ទាប់ពី ពួកគេមានលទ្ធផលស្មើគ្នាប្រកួតនៅក្រុងឡាសវេហ្គាស រដ្ឋនេវ៉ាដាខែឧសភាឆ្នាំ២០០៤ ។ កាលពី៣ឆ្នាំកន្លងទៅ ម៉ាកហ្គេសបានធ្វើដំណើរទៅកាន់ទីក្រុងម៉ានីលក្នុងគោលបំណងអង្វរ សុំប្រកួតជាមួយប៉ាក់គីអាវ។ ម៉ាកហ្គេសបានអះអាងថា ការប្រកួតចំនួន២លើកកន្លងមកជាមួយប៉ាក់គីអាវគឺខ្លួនជាអ្នកឈ្នះ តែផ្ទុយទៅវិញការកាត់ក្តីរបស់ចៅក្រមមិនដូចបំណងរបស់គេឡើយ។ ម៉ាកហ្គេសបានស្តីបន្ទោសចៅក្រមថា ឲ្យពិន្ទុខុស និងសម្រេចចិត្តមិនត្រឹមត្រូវ។
នៅសង្វៀនប្រកួតMGM Grandកាលពីថ្ងៃសៅរ៍សប្តាហ៍មុន លោកអារ៉ាំបានថ្លែងប្រាប់ក្រុមអ្នកយកព័ត៌មានថា ខ្លួនបានសម្រេចចិត្តកំណត់យកខែវិច្ឆិកាសម្រាប់ការប្រកួតបន្ទាប់ របស់ប៉ាក់គីអាវ។ ចំណែកទីកន្លែងប្រកួតលោកថាអាស្រ័យលើគូប្រកួតដែលប៉ាក់គីអាវត្រូវ ជួប។ កាលពីពេលនោះលោកបានបញ្ចេញឈ្មោះកីឡាករចំនួន៣រូបមាន ហ្វ្លយ មេវេដឌ័រ ចូអាន ម៉ានូអែល ម៉ាហ្គេស និងអ៊ែនឌ័រ បឺតូ ។ ចាប់តាំងពីពេលដែលលោកអារ៉ាំបានបញ្ចេញឲ្យដឹងពីឈ្មោះកីឡាករ ៣នាក់ ដែលអាចក្លាយជាគូប្រកួតពិតរបស់ប៉ាក់គីអាវរួចមក ម៉ាកហ្គេសហាក់ដូចជាដឹងថាខ្លួននឹងក្លាយជាមនុស្សម្នាក់ដែល ប៉ាក់គីអាវត្រូវជួបក្នុងខែវិច្ឆិកា។ចំណែកមេវេដឌ័រនិងបឺតូមិន ស្ថិតនៅក្នុងចិត្តប៉ាក់គីអាវនោះទេ ។
ស្ថានភាពមេវេដឌ័រមិនអាចនិយាយពីការជួបជាមួយ ប៉ាក់គីអាវបានទេក្នុងពេលនេះគឺខណៈកីឡាករអាមេរិករូបនេះ បានជាប់ពាក់ព័ន្ធក្នុងរៀងក្តីមួយចំនួន។ មេវេដឌ័រនឹងត្រូវបង្ហាញខ្លួនក្នុងតុលាការរដ្ឋនេវ៉ាដាឆាប់ៗខាងមុខ ក្នុងរឿងក្តីវាយតប់ និងប្រើអំពើហិង្សាលើអតីតមិត្តស្រីរបស់ខ្លួន។ ក្រៅពីនេះរូបគេក៏ប្រឈមនឹងបទចោទប្រកាន់ជាច្រើនទៀតផងដែរ ។ ចំណែកកីឡាករបឺតូវិញ ត្រូវតែយកឈ្នះវិចទ័រ អូទីសក្នុងខែមេសាខាងមុខនេះជាមុនសិនទើបអាចនិយាយពីការជួបជា មួយប៉ាក់គីអាវ បាន។ ក្នុងករណីរូបគេចាញ់កីឡាករអូទីស នោះឱកាសរបស់គេនឹងត្រូវរលាយសាបសូន្យជាមិនខាន ។
ប៉ុន្តែអ្វីដែលជាការសម្រេចចិត្តចុងក្រោយ មកដល់ពេលនេះគឺបានលេចចេញជារូបរាងច្បាស់ហើយ។ ឥឡូវនេះម៉ាកហ្គេសគឺជាបេក្ខជនសម្រាប់ការប្រកួតនៅខែវិច្ឆិការបស់ ប៉ាក់គីអាវ។ សូមបញ្ជាក់ថា ប៉ាក់គីអាវមានឯតទគ្គកម្មប្រកួតឈ្នះ៥២លើក ចាញ់៣ស្មើ២ និងធ្លាប់ផ្តួលដៃគូឲ្យសន្លប់ចំនួន៣៨លើក។ ឯម៉ាកហ្គេសធ្លាប់ប្រកួតចំនួន៥៨លើកឈ្នះ៥២លើក ចាញ់៥ស្មើ១ និងផ្តួលដៃគូឲ្យសន្លប់ចំនួន៣៨លើក ៕
No comments:
Post a Comment