ថ្ងៃ ច័ន្ទ ទី ១៤ ខែ កុម្ភៈ ឆ្នាំ ២០១១
រាជធានីភ្នំពេញ ៖ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីកាលពីព្រឹកថ្ងៃទី១៤ កុម្ភៈ ២០១១ បានចេញសេចក្តីប្រកាសព័ត៌មានបដិសេធយ៉ាងដាច់អហង្ការចំពោះការចុះផ្សាយសម្តីរបស់លោកអាប់ភីស៊ីត វ៉េចាជីវ៉ា នាយករដ្ឋមន្ត្រីសៀម ដែលបានទាមទារឱ្យអង្គការយូណេស្កូដកប្រាសាទព្រះវិហារចេញពីបញ្ជីបេតិកភណ្ឌពិភពលោក ។ ការទាមទារដោយនាយករដ្ឋមន្ត្រីរូបនេះបានអះអាងថា ការចុះបញ្ជីប្រាសាទនេះធ្វើឱ្យមានការតានតឹងរវាងប្រទេសកម្ពុជា និងប្រទេសសៀម ។
យោងតាមសេចក្តីប្រកាសព័ត៌មានជាភាសាអង់គ្លេសដែលកោះសន្តិភាពទទួលបានកាលពីព្រឹកថ្ងៃទី១៤ កុម្ភៈ ២០១១ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបន្តថា យើងសូមធ្វើការបដិសេធយ៉ាងខ្លាំងក្លាចំពោះបទអត្ថាធិប្បាយខុសរបស់លោកអាប់ភីស៊ីត វ៉េចាជីវ៉ា ហើយយើងសូមគូសបញ្ជាក់ដល់ជនរួមជាតិ និងអន្តរជាតិចំពោះប្រាសាទព្រះវិហារគឺរបស់កម្ពុជា ដែលត្រូវចុះបញ្ជីជាបេតិកភណ្ឌពិភពលោកថ្ងៃទី៧ កក្កដា ២០០៨ ជាមោទនភាពរបស់កម្ពុជា កម្ពុជាគ្មានបញ្ហាតានតឹងជាមួយប្រទេសណាទេ...ផ្ទុយទៅវិញប្រទេសសៀមប្រើពាក្យថា ការចុះបញ្ជីប្រាសាទព្រះវិហារទៅក្នុងបញ្ជីបេតិកភណ្ឌពិភពលោកនេះថា ជាការបង្កឱ្យមានភាពតានតឹងរវាងកម្ពុជា និងថៃទៅវិញ តែតាមការពិតសៀមគ្មានសិទ្ធិអ្វីលើកពីបញ្ហាប្រាសាទព្រះវិហារមកនិយាយនោះទេ ពីព្រោះសៀមគ្មានចំណែកប៉ុនចុងក្រចកពុះជា៤ឡើយ សូម្បីតែបន្តិច...។ អ្វីដែលតានតឹងចំពោះកម្ពុជានោះគឺសៀមប៉ុនប៉ងឈ្លានពានលេបត្របាក់ប្រាសាទព្រះវិហារ និងលេបទឹកដីកម្ពុជានៅតាមព្រំដែនតែប៉ុណ្ណោះ ៕
No comments:
Post a Comment