ថ្ងៃ អាទិត្យ ទី ១៣ ខែ កុម្ភៈ ឆ្នាំ ២០១១
(រូបថត កញ្ចក់ទិព្វ)
កសាងប៉ុសិ៍្តយាមឃ្លាំមើលការពារព្រៃលិចទឹកបន្ថែមទៀតនៅបាត់ដំបង
ខេត្តបាត់ដំបង ៖ ពីមួយឆ្នាំទៅមួយឆ្នាំ ព្រៃលិចទឹក ទទួលរងការទន្ទ្រាន ការកាប់រាន ឈូសឆាយ ដុតបំផ្លាញ និងហ៊ុមព័ទ្ធយកដី ដើម្បីបំរើការដាំដុះដំណាំកសិកម្ម និងសកម្មភាពផ្សេងៗ។ ផ្តើមចេញពីពហុប្រយោជន៍ ព្រៃលិចទឹករាជ រដ្ឋាភិបាលកម្ពុជាបានយកចិត្តទុកដាក់យ៉ាងខ្លាំងដើម្បីទប់ស្កាត់ និងប្រើប្រាស់តំបន់ទំនាបជុំវិញបឹងទន្លេសាប ប្រកបដោយនិរន្តរភាព ដោយដាក់ចេញនូវវិធានការម៉ឺងម៉ាត់ ជាពិសេសបទបញ្ជាលេខ០១បប ចុះថ្ងៃទី២ កក្កដា ឆ្នាំ២០១០ ស្តីពីការចាត់វិធានការ និងការការពារតំបន់ជុំវិញបឹងទន្លេសាប ។ រួមចំណែកក្នុងយន្តការអនុវត្ត បទបញ្ជា លេខ០១បបនេះ ខណ្ឌរដ្ឋបាលជលផលបាត់ដំបង សហការជាមួយអាជ្ញាធរ ដែនដី អង្គការក្រៅរដ្ឋាភិបាល រៀបចំដំឡើងប៉ុសិ៍្តយាមឃ្លាំ មើល ថែរក្សាការពារព្រៃលិចទឹកចំនួន៦កន្លែង ក្នុងស្រុកថ្មគោល និងស្រុកឯកភ្នំ ខេត្តបាត់ដំបង។
លោកហេង ពិសិដ្ឋ នាយខណ្ឌរដ្ឋបាលជលផលបាត់ដំបងមានប្រសាសន៍ថា ក្នុងសបា្តហ៍ទី២ ខែកុម្ភៈ ឆ្នាំ២០១១ នេះ ខណ្ឌរដ្ឋបាលជលផលបាត់ដំបង សហការជាមួយអាជ្ញាធរដែនដី អង្គការអភិវឌ្ឍន៍ស្ត្រីសហគមន៍នេសាទបានបញ្ចប់ដោយជោគជ័យ ការរៀបចំដាក់តាំងប៉ុសិ៍្តយាម ឃ្លាំមើល ថែរក្សាការពារព្រៃលិចទឹក (ធ្វើអំពីដែក) ចំនួន៦កន្លែង ក្នុងស្រុកថ្មគោល និងស្រុកឯកភ្នំខេត្តបាត់ដំបង ។ ប៉ុស្តិ៍យាមទាំង៦នេះ ទទួលបានការឧបត្ថម្ភពី SGP/GEF/UNDP តាមរយៈអង្គការអភិវឌ្ឍន៍ស្ត្រី ។ រហូតមកទល់ពេលនេះ ប៉ុសិ៍្តយាមទាំងឈើ និងដែកចំនួន១៤ហើយ ដែលដំឡើងលាតសន្ធឹងតាមតំបន់ព្រៃលិចទឹកពីស្រុកថ្មគោលដល់ស្រុកមោងប្ញស្សី ។
លោកនាយខណ្ឌរដ្ឋបាលជលផលបានបន្ថែមទៀតថា ជាវិធានការទប់ស្កាត់ ការកាប់រាន ឈូសឆាយ និងដុតព្រៃលិចទឹក ក្នុងឆ្នាំ២០១១ នេះ ខណ្ឌបានចាប់ផ្តើមយន្តការអប់រំ ផ្សព្វផ្សាយតាមវិទ្យុ (ជាស្ប៉តអត្ថបទ អនុសាសន៍ ថ្នាក់ដឹកនាំរាជរដ្ឋាភិបាល ជាកំណាព្យ ជាពាក្យស្លោក និងជាវាគ្មិនឆ្លើយឆ្លង តាមទូរស័ព្ទ...) ការអប់រំ ផ្សព្វផ្សាយតាមសហគមន៍មូលដ្ឋាន តាមសាលារៀន ការប្រជុំដឹកនាំដោយលោកសៀង ស៊ុតថង អភិបាលរងខេត្តបាត់ដំបង ដើម្បីកំណត់វិធានការអនុវត្តបទបញ្ជាតាមបណ្តាស្រុកទាំង៤ ជាប់បឹងទន្លេសាប ព្រមទាំងការដាក់តាំងផ្ទាំងរូបភាព ផ្សព្វផ្សាយតាមទីសាធារណៈ ចាប់តាំងពីខែធ្នូមកម្ល៉េះ ។ ដោយឡែកការកសាងប៉ុសិ៍្តយាម ទាំងនេះ មិនមែនសំរាប់តែតាមដានឃ្លាំមើលសកម្មភាពនានាប៉ះពាល់ដល់ព្រៃលិចទឹកទេ តែវាអាចឃ្លាំមើលផងដែរ នូវសកម្មភាពបទល្មើសជលផលផ្សេងៗទៀត ដើម្បីរាយការណ៍ និងចាត់វិធានការទាន់ពេលវេលា ។
លោកនាយខណ្ឌរំលឹកថា ត្រីបានដើរតួនាទីយ៉ាងសំខាន់ក្នុងរបបអាហារប្រចាំថ្ងៃរបស់ប្រជាពលរដ្ឋខ្មែរ ដោយប្រជាពលរដ្ឋខ្មែរជាមធ្យម បរិភោគត្រី៥៤,២គីឡូក្រាម ក្នុងម្នាក់ ក្នុងមួយឆ្នាំ លើសបណ្តាប្រទេសជិតខាង ។ ចំណែកព្រៃ លិចទឹក ជាជំរកពង កូន ទីសុវត្ថិភាព និងជាប្រភពចំណីសំបូរបែបសំរាប់ការលូតលាស់ ធំ ធាត់របស់ត្រី ។ ប្រភេទត្រីមួយចំនួនបានទំលាក់ពង និងញាស់ នៅភូមិសាស្ត្រប៉ែកខាងជើងនៃទន្លេមេគង្គ ហើយហូរចាក់ចូលក្នុងបឹងទន្លេសាបនៅរដូវទឹកដំឡើង ដើម្បីលូតលាស់ ធំធាត់ នៅក្នុងនាទីព្រៃលិចទឹក ។
លោកនាយខណ្ឌ សំណូមពរឱ្យមានការចូលរួមជាកំលាំង សរុប ដើម្បីអប់រំ ផ្សព្វផ្សាយ និងបង្ក្រាបបទល្មើសឱ្យបានកាន់តែខ្លាំងក្លាថែមទៀត ជាពិសេសទប់ស្កាត់ការកាប់ ឆ្ការ រាន ដុត ឬហ៊ុមព័ទ្ធដីព្រៃលិចទឹក និងសូមរាយការណ៍ជាបន្ទាន់នូវរាល់សកម្មភាពទន្ទ្រានព្រៃលិចទឹក ឬភ្លើងឆេះព្រៃលិចទឹកតាមលេខទូរស័ព្ទដូចមានភ្ជាប់តាមប៉ុសិ៍្តយាមនីមួួយៗ ។ ទន្ទឹមនឹងនេះ អំពាវនាវនាវដល់អង្គការក្រៅរដ្ឋាភិបាល ឬម្ចាស់ជំនួយផ្សេងទៀតបន្តជួយកសាងប៉ុសិ៍្តយាមបន្ថែមទៀត ឱ្យបានគ្រប់ទីកន្លែង និងជួយកសាងផ្លូវភ្លើង ដោយការជីកជាប្រឡាយក្នុងនាទីព្រៃលិចទឹកដែលមានប្រសិទ្ធភាពខ្ពស់ទប់ស្កាត់ការរាលដាល និងជាប្រភពទឹកអន្តរាគមន៍ ៕
No comments:
Post a Comment