ថ្ងៃ អាទិត្យ ទី ១៣ ខែ កុម្ភៈ ឆ្នាំ ២០១១
(រូបថត បូព៌ា)
ជនម្នាក់នេះឈ្មោះញឹក ពេក ហៅរតនា អាយុ២៤ឆ្នាំ
ខេត្តបាត់ដំបង ៖ សមត្ថកិច្ចមូលដ្ឋានបានចាប់ខ្លួនយុវជនម្នាក់ ខណៈកំពុងដឹកជញ្ជូនឈើដែលលួចរុះរើផ្ទះគេនៅចំណុចប៉ៃឡាំ ស្ថិតក្នុងភូមិបុសខ្នុរ ឃុំចែងមានជ័យ ស្រុកបាណន់ កាលពីរសៀលថ្ងៃទី១១ កុម្ភៈ ខណៈម្ចាស់ផ្ទះនេះមិននៅ ។ មន្ត្រីនគរបាលស្រុកបាណន់និយាយថា ជនម្នាក់នេះឈ្មោះញឹក ពេក ហៅរតនា អាយុ២៤ឆ្នាំ រស់នៅភូមិបុសខ្នុរ ឃុំចែងមានជ័យ រីឯម្ចាស់ផ្ទះដែលជនខាងលើលួចរុះរើឈ្មោះវ៉ន សាវ៉ាត ភេទស្រី អាយុ៣២ឆ្នាំ រស់នៅភូមិច្រាបក្រសាំង សង្កាត់វត្តគរ ក្រុងបាត់ដំបង ។ សមត្ថកិច្ចមូលដ្ឋានស្ទាក់ចាប់ជននេះ ក្នុងខណៈកំពុងដឹកឈើដែលលួចរុះរើផ្ទះគេតាមគោយន្តកន្ត្រៃបំរុងយកទៅផ្ទះ ។
តាមម្ចាស់ផ្ទះឈ្មោះវ៉ន សាវ៉ាត បានប្រាប់សមត្ថកិច្ចថា ផ្ទះនោះគាត់ធ្វើនៅក្នុងដីចំការ សំរាប់ទៅស្នាក់នៅម្តងម្កាល ប៉ុន្តែពេលគាត់ខកខានមិនបានទៅប៉ុន្មានថ្ងៃក៏ត្រូវចោរលួចគាស់យកឈើគ្រឿងផ្ទះតែម្តង ។ ឆ្លើយតបនឹងការចោទប្រកាន់ខាងលើជនឈ្មោះញឹក ពេក ហៅរតនា និយាយថា ខ្លួនមិនបានលួចគាស់ផ្ទះលួចឈើនេះទេ ។ ជននោះនិយាយថា ខ្លួនបានទិញឈើគ្រឿងផ្ទះទាំងនោះពីឈ្មោះណាក់ ក្នុងតម្លៃ១០ម៉ឺនរៀល ដែលមានក្តារ៨សន្លឹក សសរ៤ដើម និងឈើចំរៀកចំនួន២ដើម ហើយខ្លួនបានទៅដឹកចេញពីក្បែរចំការនោះដែលឈ្មោះណាក់ បានប្រាប់ឱ្យទៅដឹក ។
ដោយឡែក តាមសាក្សីបានប្រាប់សមត្ថកិច្ចថា គេមិនឃើញមានមនុស្សផ្សេងក្រៅពីឈ្មោះពេក ហៅរតនានេះទេ ដែលទៅលួចគាស់ផ្ទះក្នុងចំការគេនោះ ។ ជននេះបានប្រមូលឈើដែលគាស់បានលើកដឹកតាមគោយន្ត ហើយសមត្ថកិច្ចបានស្ទាក់ចាប់តាមផ្លូវក្រោយពីអ្នកភូមិរាយការណ៍។ ទោះជាយ៉ាងណា ជនសង្ស័យត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាលបញ្ជូនខ្លួនទៅកាន់តុលាការរួចហើយ ៕
No comments:
Post a Comment