ថ្ងៃ ច័ន្ទ ទី ១៤ ខែ កុម្ភៈ ឆ្នាំ ២០១១
(រូបថត ថ្មកែវ)
រថយន្តចុះចំណោតភ្នំដាច់ហ្វ្រាំងក្រឡាប់សង្កត់ស្លាប់អ្នកបើកបរឯព្រូរបួសធ្ងន់
ខេត្តពោធិ៍សាត់ ៖ បុរសចំណាស់ម្នាក់បានជួបគ្រោះថ្នាក់រហូតដល់ស្លាប់បាត់បង់ជីវិតដែលធ្វើឱ្យប្រពន្ធកូនសោកសង្រេងយ៉ាងខ្លាំង ឯម្នាក់ទៀតរងរបួសធ្ងន់បញ្ជូនទៅកាន់មន្ទីរពេទ្យដោយសាររថយន្តចុះចំណោតដាច់ហ្វ្រាំងក្រឡាប់សង្កត់លើ ។ គ្រោះថ្នាក់នេះបានកើតឡើងនៅលើខ្នងភ្នំ១.៥០០ម៉ែត្រ ស្ថិតក្នុងភូមិដីក្រហម ឃុំអន្លង់រាប ស្រុកវាលវែង កាលពីថ្ងៃទី១១ កុម្ភៈ ឆ្នាំ២០១១ វេលាម៉ោង៦ និង៣០នាទីល្ងាច ។ លោកវរសេនីយ៍ត្រីភួង សូឡី អធិការនគរបាលស្រុកវាលវែងឱ្យដឹងថា ជនរងគ្រោះឈ្មោះឈីវ ក្រត ភេទប្រុស អាយុ៥៩ឆ្នាំ មានទីលំនៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ជាថៅកែរថយន្តដឹកដី ឯរថយន្តដែលគ្រោះថ្នាក់ម៉ាកហ៊ីណូបែន ពណ៌ស គ្មានស្លាកលេខ ។ ចំណែកម្នាក់ទៀតជាព្រូឡានឈ្មោះសែន ម៉ៅ ភេទប្រុស អាយុ៤០ឆ្នាំ មានទីលំនៅក្នុងភូមិ-ឃុំកើតហេតុ រងរបួសធ្ងន់។
ទាក់ទិននឹងគ្រោះថ្នាក់នេះលោកអធិការឱ្យដឹងថា នៅថ្ងៃនោះលោកឈីវ ក្រត (ជនរងគ្រោះ) បានដឹកថ្មល្អិតពីទីរួមខេត្តយកទៅធ្វើសំណង់នៅព្រំដែន ឃុំថ្មដា ស្រុកវាលវែង ដោយគាត់បើកបរខ្លួនឯង ឯព្រូឡានជិះក្នុងកាប៊ីនជាមួយ ។ ការធ្វើដំណើរបានឆ្លងកាត់ប្រវែងផ្លូវជាច្រើនគីឡូម៉ែត្រឡើងភ្នំចុះភ្នំមិនជួបបញ្ហាអ្វីទាំងអស់ លុះទៅដល់ចំណុចខាងលើ ខណៈ ពេលដែលរថយន្តកំពុងចុះចំណោតពីលើខ្នងភ្នំ១.៥០០ម៉ែត្រ ស្រាប់តែរថយន្តដាច់ហ្វ្រាំងហើយចំ កន្លែងផ្លូវកោងផងនោះបត់មិនទាន់ បណ្តាលឱ្យកង់រថយន្តខាងឆ្វេង ធ្លាក់ចូលប្រឡាយដែលទើបធ្វើថ្មីផ្ញុចនឹងដីសង្កត់ជាប់ក្នុងកាប៊ីនស្លាប់ភ្លាមៗនៅនឹងកន្លែងកើតហេតុ ឯម្នាក់ទៀតយកចេញបានតែរបួសយ៉ាងធ្ងន់ធ្ងរបញ្ជូនទៅកាន់មន្ទីរពេទ្យ ។ លោកអធិការបានឱ្យដឹងទៀតថា សពជាប់នៅទីនោះមួយយប់ លុះស្អែកឡើងម៉ោង១០ព្រឹកថ្ងៃទី១២ កុម្ភៈ ទើបយកចេញបានទៅធ្វើបុណ្យ ដោយប្រើរណារយន្តអារកាត់ដែកកាប៊ីនរថយន្ត ៕
No comments:
Post a Comment