ថ្ងៃ ច័ន្ទ ទី ១៤ ខែ កុម្ភៈ ឆ្នាំ ២០១១
(រូបថត តាសោម)
នាវាដែលចូលមកដល់កំពង់ផែនេះ មានឈ្មោះ NAUTCA ជារបស់ប្រទេសម៉ាសាល
ខេត្តព្រះសីហនុ ៖ ទោះបីជានៅតាមបណ្តាព្រំដែនកម្ពុជា-ថៃមានសង្គ្រាមកើតឡើងក៏ដោយ ក៏ភ្ញៀវទេសចរចូលមកកំសាន្តព្រះរាជាណាចក្រកម្ពុជាមានការកើនឡើងពីមួយថ្ងៃទៅមួយថ្ងៃដែរ ។ ជាក់ស្តែងកាលពីព្រឹកថ្ងៃ១៣ កុម្ភៈ វេលាម៉ោង៨ និង៣០នាទី មាននាវាទេសចរណ៍ខ្នាតអន្តរជាតិបានចូលមកសំចតនៅកំពង់ផែអន្តរជាតិ ខេត្តព្រះសីហនុ ដោយមានភ្ញៀវទេសចរយ៉ាងច្រើនជាតិសាសន៍។
លោកម៉ៃ ម៉ារិទ្ធ នាយកនាវាទេសចរណ៍ និងកណ្ណធារនៃកំពង់ផែស្វយ័តក្រុងព្រះសីហនុ បានឱ្យដឹងថា នាវាដែលចូលមកដល់កំពង់ផែនេះ មានឈ្មោះ NAUTCA ជារបស់ប្រទេសម៉ាសាល មានបណ្តោយ១៨៦ម៉ែត្រ ទទឹង២៥ម៉ែត្រ មាននាវិកសរុប៣៩៥នាក់ ភ្ញៀវទេសចរ៦១៣នាក់ ស្មើនឹង១៦ជាតិសាសន៍ ។ ប្រភពដដែលបានបន្តទៀតថា នាវាទេសចរណ៍នេះបានចូលសំចតនៅកំពង់ផែប្រទេសវៀតណាម ហើយទើបមកដល់កម្ពុជា និងគ្រោងបន្តទៅកាន់កំពង់ផែនៃប្រទេសថៃទៀត ។ នាវានេះនឹងត្រូវចាកចេញទៅវិញនៅវេលាម៉ោង១៩ក្នុងថ្ងៃដដែល។
អ្នកបើកម៉ូតូកង់៣ដឹកភ្ញៀវទេសចរម្នាក់ បានញញឹមមកកាន់អ្នកយកព័ត៌មាន ហើយរៀបរាប់ថា លោកមានចិត្តសប្បាយរីករាយយ៉ាងខ្លាំងនៅពេលឃើញកំណើនភ្ញៀវទេសចរនៅលើទឹកដីខេត្តព្រះសីហនុពីមួយថ្ងៃទៅមួយថ្ងៃ ជាហេតុធ្វើឱ្យជីវភាពគ្រួសាររបស់លោកមានការធូរធារច្រើនជាងមុន ។ លោកបានថ្លែងអំណរគុណយ៉ាងជ្រាលជ្រៅដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានយកអស់កំលាំងកាយចិត្តក្នុងការដឹកនាំប្រទេសឱ្យមានសុខសន្តិភាព និងភាពសំបូរសប្បាយរីកចំរើនគ្រប់វិស័យជាពិសេសវិស័យទេសចរណ៍ ជាក់ស្តែងគ្រួសារលោកជាដើមបានទទួលផ្លែផ្កាតាមរយៈការរីកចំរើនលើវិស័យទេសចរណ៍នេះផងដែរ៕
No comments:
Post a Comment