ថ្ងៃ អង្គារ ទី ២២ ខែ កុម្ភៈ ឆ្នាំ ២០១១
(រូបថត រក្សា)
ប៉ូលិសប្រឆាំងបទល្មើសសេដ្ឋកិច្ចបង្ក្រាបរថយន្តដឹកកម្ទេចមី និងកាកសំណល់វត្ថុរាវ
ខេត្តបន្ទាយមានជ័យ ៖ កាលពីវេលាម៉ោង១១យប់ ថ្ងៃទី២១ កុម្ភៈ កម្លាំងប៉ូលិសប្រឆាំងបទល្មើសសេដ្ឋកិច្ចនៃស្នងការដ្ឋានខេត្ត សហការជាមួយកម្លាំងប៉ូលិសនៃនាយកដ្ឋានប្រឆាំងបទល្មើសសេដ្ឋ កិច្ច បានចាប់ឃាត់រថយន្តមួយគ្រឿងម៉ាកនីស្សាន់ ពណ៌ទឹកប៊ិច ស៊េរី៩២ ពាក់ស្លាកលេខភ្នំពេញ២G១៤៧១ ដែលមានដឹកកាកសំណល់កម្ទេចមី និងកាកសំណល់វត្ថុរាវពណ៌ខ្មៅសង្ស័យមានសារធាតុអាស៊ីដ។ ការឃាត់ចាប់រថយន្តនេះបានធ្វើឡើងនៅចំណុចផ្លូវលេខ៣ ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ។
តាមប្រភពពីលោកវរសេនីយ៍ត្រីចាប សុផាឫទ្ធិ នាយការិយាល័យប៉ូលិសប្រឆាំងបទល្មើសសេដ្ឋកិច្ចបានឱ្យដឹងថា ម្ចាស់រថយន្តខាងលើដែលត្រូវឃាត់បញ្ជូនទៅស្នងការដ្ឋាននគរបាល ខេត្តនោះ ឈ្មោះសេន ណូ ភេទស្រី អាយុ៤៣ឆ្នាំ នៅភូមិសែសិន សង្កាត់អូរអំបិល ក្រុងសិរីសោភ័ណ និងអ្នកបើកបរឈ្មោះទិត្យ នឿន ភេទប្រុស អាយុជាង២០ឆ្នាំ នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ។ បើតាមការសាកសួរពីអ្នកបើកបរ និងម្ចាស់រថយន្តបានអះអាងថា ទំនិញទាំងអស់នេះ គឺពួកគដឹកចូលមកពីប្រទេសសៀមតាមច្រករបៀងប៉ុស្តិ៍លេខ១០ ក្នុងភូមិសាស្ត្រក្រុងប៉ោយប៉ែត ប៉ុន្តែពួកគេមិនប្រាប់ឈ្មោះម្ចាស់ទំនិញផ្ទាល់នោះទេ ដោយគ្រាន់តែនិយាយថា ពួកគេជាអ្នកស៊ីឈ្នួលដឹកប៉ុណ្ណោះ ប៉ុន្តែចុងក្រោយគេបានប្រាប់ថា ម្ចាស់ទំនិញគឺជាជនជាតិសៀម ។ ការដឹកទំនិញទាំងនេះ គឺគេយកមកចែកចាយឱ្យខេត្តចំនួន៣ មានខេត្តសៀមរាប បាត់ដំបង និងខេត្តបន្ទាយមានជ័យ។
ប្រភពដដែលបន្តថា តាមការត្រួតពិនិត្យជាក់ស្តែងដែលមានសមត្ថកិច្ចចំរុះរួមមាន កម្លាំងប៉ូលិសប្រឆាំងបទល្មើសខេត្ត នាយកដ្ឋានកាំកុងត្រូល និងសុខាភិបាលខេត្ត កម្ទេចមីដែលជាកាកសំណល់សរុបមានចំនួន២១៧ការុង ស្មើនឹង៥១០គីឡូក្រាម និងកាកសំណល់វត្ថុរាវមានសារធាតុអាស៊ីដចំនួន៥៩ប៊ីដុង ស្មើ១.១៨០គីឡូក្រាម។ លោកស៊ាន សីុណាត អនុប្រធានកាំកុងត្រូលបានឱ្យដឹងថា កម្ទេចមីទាំងនេះត្រូវបានច្រកក្នុងថង់ប្លាស្ទិកតូចៗសម្រាប់ ក្មេងហូប ដោយសញ្ញាថង់ប្លាសិ្ទកនោះ មានខ្លះអក្សរថ្នាំ TYLINOL សាប៊ូកក់សក់ និងភ្លៅមាន់ ហើយកម្ទេចមីទាំងនេះប្រសិនបើក្មេងហូបអាចប៉ះពាល់ដល់សុខភាព របស់ពួកគេ។ ដោយឡែកកាកសំណល់វត្ថុរាវមានសារធាតុអាសីុដពណ៌ខ្មៅនេះ សមត្ថកិច្ចជំនាញនឹងយកទៅធ្វើការដកពិសោធន៍ឱ្យបានច្បាស់លាស់។
លោកឧត្តមសេនីយ៍ត្រីខេង ស៊ុម ស្នងការនគរបាលខេត្តបន្ទាយមានជ័យ មានប្រសាសន៍ថា ម្ចាស់រថយន្ត និងអ្នកបើកបរ ព្រមទាំងទំនិញមិនប្រក្រតី ត្រូវកម្លាំងជំនាញឃាត់ខ្លួន និងរក្សាទុកនៅស្នងការដ្ឋាននគរបាល ដើម្បីរៀបចំសំណុំរឿងបញ្ជូនទៅសាលាដំបូងខេត្តចាត់ការតាមនី តិវិធី។ លោកស្នងការបញ្ជាក់ថា ថ្វីដ្បិតតែម្ចាស់រថយន្ត និងអ្នកបើកបរមិនប្រាប់ឈ្មោះម្ចាស់ទំនិញពិតប្រាកដក្តី សមត្ថកិច្ចនឹងធ្វើការស្រាវជ្រាវបន្តផងដែរ ដើម្បីឈានដល់រកឱ្យឃើញម្ចាស់ទំនិញខាងលើ ៕
No comments:
Post a Comment