ថ្ងៃ អង្គារ ទី ២២ ខែ កុម្ភៈ ឆ្នាំ ២០១១
(រូបថត រាជក្រុង)
ទីតាំងសង្ស័យលួចលាក់បំរើសេវាផ្លូវភេទរបស់ក្រុមនារីជនជាតិវៀតណាម
ខេត្តសៀមរាប ៖ ទីតាំងសង្ស័យលួចលាក់បំរើសេវាផ្លូវភេទរបស់ក្រុមនារីជនជាតិវៀត ណាម ក្រោមស្លាកលក់កាហ្វេ ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប មួយកន្លែងត្រូវកម្លាំងសមត្ថកិច្ច អាជ្ញាធរជំនាញការិយាល័យនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ត ដឹកនាំដោយលោកអនុសេនីយ៍ទោ ស៊ុន ប៊ុនថង ជានាយការិយាល័យ និងមានការចូលរួម ពីលោកព្រះរាជអាជ្ញារងអមសាលាដំបូងខេត្ត សហការជាមួយកម្លាំងនគរបាលនៃអធិការដ្ឋាននគរបាលក្រុង និងកម្លាំងសមត្ថកិច្ចប៉ុស្តិ៍រដ្ឋបាល នគរបាលមូលដ្ឋានសង្កាត់ស្វាយដង្គំ បានឆ្មក់ចូលបង្ក្រាបកាលពីវេលាម៉ោងប្រមាណ១០យប់ ថ្ងៃទី២១ កុម្ភៈ ។
តាមប្រភពពីមន្ត្រីប៉ូលិសឱ្យដឹងថា ប្រតិបត្តិការឆ្មក់ចូលទីតាំងសង្ស័យលួចលាក់បំរើសេវាផ្លូវភេទ របស់ក្រុមនារីជនជាតិវៀតណាម ដែលជ្រកក្រោមស្លាកលក់កាហ្វេខាងលើនេះ សមត្ថកិច្ចបានឃាត់ខ្លួនស្ត្រីជាថៅកែហាងម្នាក់ឈ្មោះគឺម លាង អាយុ៥៣ឆ្នាំ និងក្រុមនាងៗចំនួន៤នាក់ ១-ឈ្មោះង្វៀង ធីយ៉ាវ អាយុ២៧ឆ្នាំ ២-ឈ្មោះថី ហ្វឿង អាយុ២៧ឆ្នាំ ៣-ឈ្មោះង្វៀង ធីហាយ អាយុ២៨ឆ្នាំ និង៤-ឈ្មោះង្វៀង ធីឡេ អាយុ៣០ឆ្នាំ ស្ត្រីទាំងនេះជាជនជាតិវៀតណាម ព្រមទាំងដកហូតបានទូរទស្សន៍ទំហំ១២អ៊ីញមួយគ្រឿង និងស្រោមអនាម័យទាំងប្រើរួច និងមិនទាន់ប្រើចំនួន១ស្បោងធំជាវត្ថុតាងផងដែរ។
លោកអនុសេនីយ៍ទោ ស៊ុន ប៊ុនថង ជានាយការិយាល័យនគរបាលប្រឆាំងការជួញដូរមនុស្ស និងការពារអនីតិជនខេត្តបានឱ្យដឹងថា បន្ទាប់ពីធ្វើការសាកសួរ ក្រុមស្ត្រីទាំង៤នាក់រួចសមត្ថកិច្ចប្រគល់ទៅឱ្យខាងមន្ទីរ សង្គមកិច្ចខេត្ត ។ ដោយឡែចំពោះស្ត្រីជាថៅកែម្ចាស់ហាងឈ្មោះគឺមលាង ត្រូវបានកសាងសំណុំរឿងបញ្ជូនខ្លួនទៅកាន់សាលាដំបូងខេត្ត កាលពីរសៀលថ្ងៃទី២២ កុម្ភៈ ៕
No comments:
Post a Comment