ថ្ងៃ ច័ន្ទ ទី ២៨ ខែ កុម្ភៈ ឆ្នាំ ២០១១
(រូបថត ចំរើន)
ជិះម៉ូតូបណ្តើរនិយាយទូរស័ព្ទបណ្តើររថយន្តកៀរស្លាប់
ខេត្តកំពង់ស្ពឺ ៖ គ្រោះថ្នាក់ចរាចរណ៍មួយបានកើតឡើងកាលពីវេលាម៉ោង២រសៀល ថ្ងៃទី២៧ កុម្ភៈ លើកំណាត់ផ្លូវជាតិលេខ៤ ចន្លោះគីឡូម៉ែត្រលេខ៤៩និង៥០នៅក្នុងភូមិព្រៃស្លឹក សង្កាត់ច្បារមន ក្រុងច្បារមន រវាងរថយន្ត និងម៉ូតូ បណ្តាលឱ្យម្ចាស់ម៉ូតូស្លាប់ដោយសាររថយន្តកិនបែកក្បាលនៅនឹង កន្លែងកើតហេតុ ខណៈដែលម៉ូតូ និងរថយន្តបើកបរស្របទិសគ្នាពីផ្សារកំពង់ស្ពឺ ទៅទិសស្រែអំបិល ។
មន្ត្រីនគរបាលចរាចរខេត្តបានចុះទៅត្រួត ពិនិត្យកន្លែងកើតហេតុឱ្យដឹងថា ជនរងគ្រោះដល់ស្លាប់ជិះម៉ូតូម៉ាកស្មាស់ ពណ៌លឿងលាយខ្មៅ គ្មានស្លាកលេខ ឈ្មោះអាន សុខហាក់ ភេទប្រុស អាយុ២៤ឆ្នាំ មានទីលំនៅក្នុងភូមិត្រពាំងតាហន់ ឃុំញ្នយ ស្រុកសំរោងទង ។ សាក្សីឃើញហេតុការណ៍នោះបានប្រាប់ឱ្យដឹងថា មុនពេលកើតហេតុជនរងគ្រោះបើកម៉ូតូស្មាស់របស់ខ្លួនពីទិស ខាងកើតទៅទិសខាងលិច ដោយបើកបណ្តើរនិយាយទូរស័ព្ទបណ្តើរ ។ លុះមកដល់ភូមិព្រៃស្លឹក សង្កាត់ច្បារមន ខាងកើតស្ពានធ្នុះលួង ក៏ត្រូវរថយន្តម៉ាកហ៊ីណូ ពាក់ស្លាកលេខ 3A-6144 ពណ៌ទឹកប៊ិច បើកទៅពីក្រោយកៀរបណ្តាលឱ្យដួលចូលក្រោមរថយន្តអូសម៉ូតូ ប្រមាណ៧០ម៉ែត្រ រីឯអ្នកបើកបរម៉ូតូនោះត្រូវកង់រថយន្តកិនបែកក្បាលស្លាប់ នៅនឹងកន្លែងយ៉ាងអាណោចអាធ័ម ។
ក្រោយពេលកើតហេតុ អ្នកបើកបររថយន្តបង្កគ្រោះថ្នាក់បានរត់គេចខ្លួនបាត់ រីឯសពជនរងគ្រោះត្រូវបានបងប្អូនក្រុមគ្រួសារដឹកយកទៅលំនៅ ឋាន ដើម្បីធ្វើបុណ្យតាមប្រពៃណី ។ ដោយឡែករថយន្តបង្កហេតុ និងម៉ូតូជនរងគ្រោះត្រូវបានសមត្ថកិច្ចដឹកយកទៅរក្សាទុកនៅ ការិយាល័យចរាចរណ៍ខេត្ត ដើម្បីកសាងសំណុំរឿងបញ្ជូនទៅកាន់ស្ថាប័នតុលាការចាត់ការតាម នីតិវិធី ៕
No comments:
Post a Comment