ថ្ងៃ អង្គារ ទី ២២ ខែ កុម្ភៈ ឆ្នាំ ២០១១
(រូបថត បាវិត)
គ្រោះថ្នាក់ចរាចរណ៍ជាបន្តបន្ទាប់របួសធ្ងន់៣នាក់ ស្រាល៣នាក់
ខេត្តស្វាយរៀង ៖ មានគ្រោះថ្នាក់ចរាចរណ៍កើតឡើង២ករណីកាលពីថ្ងៃទី២០ កុម្ភៈ នៅកន្លែងផ្សេងគ្នាបណ្តាលឱ្យរបួសធ្ងន់ធ្ងរ៣នាក់ និងស្រាល៣នាក់។
ករណីទី១ កើតឡើងនាវេលាម៉ោង៤រសៀលនៅភូមិត្រពាំងស្មាច់ ឃុំខ្សែត្រ ស្រុកកំពង់រោទ៍ លើផ្លូវលំខាងកើតវត្តព្រៃចំណារប្រមាណ៥០០ម៉ែត្រ បណ្តាលឱ្យឈ្មោះភឹម វណ្ណី អាយុ២២ឆ្នាំ នៅភូមិព្រៃចំណារ ឃុំខ្សែត្រ រងរបួសបាក់.កជើងឆ្វេង បែកចង្កាចិញ្ចើម និងគ្រេចចង្កេះ រីឯ៣នាក់ទៀតរបួសស្រាលរយះជង្គង់ រលាត់ដៃ និងមុខ ។ បើតាមឈ្មោះភឹម វណ្ណី បានឱ្យដឹងថា នៅវេលាម៉ោង៤រសៀលនោះ រូបគេបានជិះម៉ូតូហុងដា C125 ស៊េរីឆ្នាំ២០០៨ ពណ៌ខ្មៅ ឌុបមិត្តភក្តិពីរនាក់ចេញពីផ្ទះទៅកាន់ភូមិត្រពាំងស្មាច់ ។ ពេលទៅដល់ចំណុចខាងលើ ស្រាប់តែមានម៉ូតូមួយគ្រឿងទៀតជិះបញ្ច្រាសទិសគ្នារេចង្កូតម្តង ឆ្វេង ម្តងស្តាំ ក៏បុកចំដៃចង្កូតឆ្វេងបណ្តាលឱ្យដួលលើគ្នាទាំងម៉ូតូទាំងមនុស្ស។ ក្រោយមកជនបង្កបានលើកម៉ូតូជិះរត់គេចខ្លួនទាំងផ្ទៃមុខឈាមរហាម ឯរូបគេបាក់.កជើងខាងឆ្វេង និងជាប់ចង្កេះ ហើយត្រូវបានឪពុកម្តាយបញ្ជូនមកមន្ទីរពេទ្យខេត្ត ។
ករណីទី២ កើតឡើងនាវេលាម៉ោង៨និង៣០នាទីយប់ នៅភូមិស៊ីការ ឃុំស្វាយយារ ស្រុកស្វាយជ្រំ បណ្តាលឱ្យរបួសធ្ងន់២នាក់ គឺកុមារាឈ្មោះវ៉ាន់ តុលា អាយុ១៤ឆ្នាំ រងរបួសក្បាលផ្នែកខាងស្តាំផុងលលាដ៍ រយះជង្គង់ស្តាំ រលាត់ដៃជើង និងកុមារីវ៉ាន់ ស្រីសយ អាយុ១៣ឆ្នាំ បែកក្បាលត្រង់ថ្ងាសផុងលលាដ៍ រយះស្មាទាំងសងខាង ជាំខ្នង និងរយះជង្គង់ទាំងសងខាងសន្លប់នៅនឹងកន្លែង ។ បើតាមបុរសឈ្មោះភោគ វុទ្ធី អាយុ៣៨ឆ្នាំ ត្រូវជាឪពុកកុមារទាំងពីរនាក់ឱ្យដឹងថា នៅយប់នោះមានក្រុមហ៊ុនចិនសែ បានទៅផ្សាយពាណិជ្ជកម្មលក់ថ្នាំរបស់គេនៅក្នុងភូមិខាងលើ ដោយមានលេងប៉ាហ៊ី លេងសៀក និងមានក្រុមតន្ត្រីច្រៀងរាំ ទើបកូនៗគាត់នាំគ្នាទៅមើល។ លុះដល់ម៉ោងជាង៨ ដោយសារមានភ្លៀងធ្លាក់ស្រិចៗ កូនៗរបស់គាត់ទាំងពីរនាក់បងប្អូនក៏ដើរកាន់ដៃគ្នាត្រឡប់មក ផ្ទះវិញ តែពេលមកដល់ដើរចូលភូមិ ស្រាប់តែមានម៉ូតូ២គ្រឿងជិះជ្រែវ៉ាគ្នាយ៉ាងលឿន ម៉ូតូហុងដា C125 មួយគ្រឿង ពណ៌ខ្មៅ ឌុបគ្នា៣នាក់ បានបុកចំកុមារីវ៉ាន់ ស្រីសយ ប៉ើងប្រហែល២ម៉ែត្រ សន្លប់ឈឹង និងបានបុកអូសកុមារាវ៉ាន់ តុលា ដួលបោកក្បាលនៅនឹងថ្នល់ ។ ក្រោយហេតុការណ៍កើតឡើងអ្នកភូមិក៏នាំគ្នាមកមើល រួចចាប់ជនបង្កជាប់ ហើយទូរស័ព្ទហៅប៉ូលិសឱ្យមកដោះស្រាយ ៕
No comments:
Post a Comment