ថ្ងៃ សុក្រ ទី ១៨ ខែ កុម្ភៈ ឆ្នាំ ២០១១
(រូបថត ចោមចៅ)
រោងការប្រពន្ធថ្មីរបស់បុរសជាប្តី
រាជធានីភ្នំពេញ ៖ បុរសម្នាក់ដែលបានចុះចោលប្រពន្ធនិងកូនទៅរៀបការជាមួយស្រីថ្មីទៀតធ្វើឱ្យស្ត្រីជាប្រពន្ធដើមឆ្អែតចិត្ត និងយំសោកសង្រេងតែឯងឯកា រួចបាននាំកូនប្រុសស្រីចំនួន៣នាក់ធ្វើដំណើរទៅកាន់សាលាសង្កាត់កាកាបដើម្បីប្តឹងសុំឱ្យអាជ្ញាធរជួយរកយុត្តិធម៌។ ហេតុការណ៍ជួយឱ្យអាជ្ញាធរសាលាសង្កាត់កាកាបជួយអន្តរាគមន៍នេះកើតឡើងនៅវេលាព្រឹកថ្ងៃទី១៧ កុម្ភៈ ឆ្នាំ២០១១ ដែលនៅព្រឹកនោះគឺជាពេលដែលប្តីរបស់គាត់កំពុងរៀបការជាមួយស្រីថ្មី ហើយកន្លែងរៀបការនោះស្ថិតនៅចម្ងាយប្រមាណ៥០០ម៉ែត្រប៉ុណ្ណោះពីសាលាសង្កាត់កាកាប ។
ស្ត្រីប្រពន្ធដើមឈ្មោះសេង វ៉ាន់នី អាយុ២៧ឆ្នាំ រស់នៅភូមិចំពុះក្អែក សង្កាត់ព្រែកថ្មី ខណ្ឌមានជ័យ រាជធានីភ្នំពេញ ។ នាងមានកូនស្រី២នាក់ និងកូនប្រុសម្នាក់ ហើយប្តីរបស់នាងឈ្មោះហេង សុភាព ហៅដារឺត អាយុ២៨ឆ្នាំ ជាបុគ្គលិកក្រុមហ៊ុនធ្វើផ្លូវ ។ តាមប្រភពពីស្ត្រីជាប្រពន្ធដើមបានរៀបរាប់ទាំងក្តុកក្តួលក្នុងចិត្តថា រូបនាងនិងប្តីបានរៀបការជាមួយគ្នាត្រឹមត្រូវតាមផ្លូវច្បាប់ កាលពីឆ្នាំ២០០១មកម៉្លេះ ប៉ុន្តែពួកគេទាំងពីរនាក់អត់បានចុះអេតាស៊ីវិលជាមួយគ្នាទេ ហើយចំណងដៃអាពាហ៍ពិពាហ៍រវាងពួកគេទាំងពីរនាក់គឺកូនស្រី២នាក់ និងកូនប្រុសម្នាក់ ព្រមទាំងមានសុភមង្គលល្អធម្មតា ។ ស្ត្រីរូបនោះ បានបន្តថាបន្ទាប់ពីមានសេចក្តីសុខអស់ជាច្រើនឆ្នាំមក នៅរយៈពេល១ឆ្នាំចុងក្រោយនេះ រវាងនាងនិងប្តីមានទំនាស់កើតឡើង ហើយបុរសជាប្តីឧស្សាហ៍ចេញបាត់ពីផ្ទះញឹកញាប់ទៀតផង។ លុះរយៈពេល៥ទៅ៦ខែចុងក្រោយនេះ ប្តីនាងបានចុះចេញពីផ្ទះបាត់តែម្តងហើយនៅពេលនាងតាមដានមានគេប្រាប់ថា ប្តីរបស់នាងបានភ្ជាប់ពាក្យត្រៀមរៀបការជាមួយស្រីថ្មីម្នាក់ទៀត ។
ស្ត្រីរូបនោះបានបន្តទៀតថា ប្តីរបស់នាងបានភ្ជាប់ពាក្យជាមួយស្រីថ្មីតាំងពីអំឡុងខែកុម្ភៈ ឆ្នាំ២០១០ម៉្លេះ ប៉ុន្តែនាងអត់បានដឹងភ្លាមៗនោះទេ រហូតប្តីចុះចេញពីផ្ទះរយៈពេល៥ទៅ៦ខែទើបដឹងហើយនាងមិនអាចរារាំងប្តីបានឡើយមានតែរង់ចាំដល់ថ្ងៃប្តីចូលរោងការទើបប្តឹងឱ្យអាជ្ញាធរជួយអន្តរាគមន៍ហៅប្តីមកដោះស្រាយ ។ ស្ត្រីជាប្រពន្ធដើមបានឱ្យដឹងថា ប្រពន្ធថ្មីរបស់ប្តីនាងឈ្មោះហេង សុខលាភ អាយុប្រហែល២០ឆ្នាំ មានទីលំនៅភូមិតាងួន សង្កាត់កាកាប ខណ្ឌដង្កោ រាជធានីភ្នំពេញ ទល់មុខផ្សារស៊ិនជូរីផ្លាហ្សា ។ ពេលនេះ នាងហួសចិត្តខ្លាំងណាស់ចំពោះទង្វើអគតិរបស់ប្តីបែបនេះ ហើយនាងក៏លែងគិតអ្វីដែរ បើបានជាជ្រុលបែបនេះទៅហើយនោះ មានតែបណ្តោយឱ្យទៅតាមបំណងគេចុះ ប៉ុន្តែនាងសុំឱ្យអាជ្ញាធរជួយហៅប្តីមកសម្របសម្រួលដាក់លក្ខខណ្ឌជួយចិញ្ចឹមកូនផង ព្រោះកូននៅតូចៗ ហើយនាងក៏គ្មានលទ្ធភាពចិញ្ចឹមពួកគេដែរ ។
ទាក់ទិននឹងបញ្ហានេះមានមតិជាច្រើននិយាយថា សព្វថ្ងៃនេះ ច្បាប់តឹងរ៉ឹងណាស់រៀបការទាល់តែមានច្បាប់បញ្ជាក់ថា នៅលីវឬពោះម៉ាយពីអាជ្ញាធរទើបអនុញ្ញាតឱ្យរៀបការបាន។ ប៉ុន្តែបុរសរូបនោះមិនមានឯកសារបញ្ជាក់ថា គេនៅពោះម៉ាយនោះទេ ហើយក៏គ្មានលិខិតលែងលះឬសាលក្រមចេញពីតុលាការអ្វីទាំងអស់ តែគេនៅតែរៀបការបានយ៉ាងស្រួលដដែល។ ទោះបីជាបែបណា ស្ត្រីជាប្រពន្ធដើមមានចរិតស្លូតបូតណាស់មិនបានចូលទៅអុកឡុករោងការនោះទេ ដោយគ្រាន់តែប្តឹងអាជ្ញាធរឱ្យជួយប៉ុណ្ណោះ ហើយអាជ្ញាធរក៏បានហៅបុរសជាប្តីទៅធ្វើការសម្របសម្រួលដោះស្រាយជាមួយប្រពន្ធ ដោយអាជ្ញាធរបានអះអាងថា ការទាមទាររបស់ប្រពន្ធដើមមិនធ្ងន់ធ្ងរនោះទេ គ្រាន់តែឱ្យជួយចិញ្ចឹមកូនប៉ុណ្ណោះដូច្នេះការដោះស្រាយអាចត្រូវគ្នា ដើម្បីរំលត់កំហឹងផឹតក្បត់ ៕
No comments:
Post a Comment