ថ្ងៃ ច័ន្ទ ទី ២១ ខែ កុម្ភៈ ឆ្នាំ ២០១១
(រូបថត ដាណេ)
CJCC បង្ហាញការពិសោធផ្នែកវិទ្យាសាស្ត្រសំរាប់កុមារ
រាជធានីភ្នំពេញ ៖ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ដោយមានកិច្ចសហការជាមួយក្រុមអ្នកស្ម័គ្រចិត្តជប៉ុនបានរៀបចំបង្ហាញកម្មវិធីមួយដែលមានឈ្មោះថា «ការពិសោធវិទ្យាសាស្ត្រ»។ កម្មវិធីនេះប្រព្រឹត្តទៅកាលពីព្រឹកថ្ងៃទី២១ កុម្ភៈ នៅមជ្ឈមណ្ឌលសហប្រតិបត្តិការកម្ពុជា-ជប៉ុន ហើយកម្មវិធីនេះក៏ជាការរំលឹកខួបលើកទី៦ របស់មជ្ឈមណ្ឌលសហប្រតិបត្តិការកម្ពុជា-ជប៉ុនផងដែរ។
លោកគ្រូ អ្នកគ្រូ ព្រមទាំងអ្នកស្ម័គ្រចិត្តជប៉ុនជាច្រើនរូបមកពី១០ខេត្ត គឺខេត្តបាត់ដំបង, ព្រៃវែង, កណ្តាល, តាកែវ, ព្រះសីហនុ, កំពង់ចាម, សៀមរាប, កំពង់ឆ្នាំង, កំពត និងកំពង់ធំ បានចូលរួមក្នុងកម្មវិធីនេះ។ ដោយឡែកសិស្សានុសិស្សប្រមាណ២០០នាក់មកពីវិទ្យាល័យបាក់ទូក និងសាលាទួលគោក ក៏បានចូលរួមក្នុងឱកាសនោះដែរ។ កម្មវិធីនេះបានផ្តល់ឱកាសឱ្យកុមារទាំងអស់បានស្គាល់ការពិសោធតាមរយៈការផ្តល់ជូនពីសំណាក់លោកគ្រូ អ្នកគ្រូ ដែលតំរូវឱ្យពួកគេអនុវត្តជាក់ស្តែងអំពីការពិសោធវិទ្យាសាស្ត្រ។
មជ្ឈមណ្ឌលសហប្រតិបត្តិការកម្ពុជា-ជប៉ុនតែងតែបង្កើតឱ្យមានកម្មវិធីប្លែកៗសំរាប់អភិវឌ្ឍផ្នែកគំនិតដល់សិស្ស-និស្សិតប្រយោជន៍ឱ្យពួកគេ ពង្រឹងចំណេះដឹងផ្ទាល់ខ្លួន។ កម្មវិធីទាំងនេះក៏ផ្តល់ឱកាសសំរាប់សិស្ស-និស្សិតបានសប្បាយរីករាយ និងជាការរឹតចំណងសាមគ្គីភាពយ៉ាងល្អប្រសើរផងដែរ៕
No comments:
Post a Comment