ថ្ងៃ អង្គារ ទី ២២ ខែ កុម្ភៈ ឆ្នាំ ២០១១
រូបភាពពីវ៉េបសាយ
កិច្ចប្រជុំរដ្ឋមន្ត្រីការបរទេសអាស៊ាននៅក្នុងទីក្រុងហ្សាការតា ប្រទេសឥណ្ឌូណេស៊ី
រដ្ឋមន្ត្រីការបរទេសមកពីប្រទេសអាស៊ាន បានបើកកិច្ចប្រជុំបន្ទាន់មួយនៅក្នុងទីក្រុងហ្សាការតា ប្រទេសឥណ្ឌូណេស៊ី នៅថ្ងៃទី២២ កុម្ភៈ ស្តីអំពីបញ្ហាជម្លោះព្រំដែនរវាងប្រទេសកម្ពុជា និងប្រទេសថៃ និងដើម្បីរិះរកមធ្យោបាយបញ្ចប់ជម្លោះនេះ ។
លោកម៉ាទី ណាតាឡេហ្គាវ៉ា រដ្ឋមន្ត្រីការបរទេសនៃសាធារណរដ្ឋឥណ្ឌូណេស៊ី ដែលជាប្រធានអាស៊ាន ថ្លែងមុនពេលបើកកិច្ចប្រជុំថា «យើងបើកកិច្ចប្រជុំនេះឡើងដើម្បីដោះស្រាយបញ្ហាតាមរយៈការចរចា ហើយយើងធ្វើអ្វីដើម្បីសន្តិភាពមិនមែនដើម្បីធ្វើសង្គ្រាម នោះទេ ដូច្នេះសូមកុំឱ្យសំឡេងកាំភ្លើង និងការផ្ទុះអាវុធឮនៅក្នុងតំបន់របស់យើងទៀត» ។ លោកគូសបញ្ជាក់ថា ក្រុមក្នុងតំបន់បានត្រៀមខ្លួនជាស្រេច ដើម្បីធ្វើអន្តរាគមន៍ ហើយប្រកាន់គោលជំហររឹងមាំ ។
លោកមាទី ណាតឡេហ្គាវ៉ា ថ្លែងទៀតថា «ខ្ញុំចង់បញ្ជាក់ច្បាស់ថា ជម្រើសនៃជម្លោះនៃការប្រើប្រាស់កម្លាំងទ័ពមិនមែនជាមធ្យោបាយ ត្រូវយកមកប្រើប្រាស់នោះទេ ។
ជាមួយគ្នានេះ យោងតាមប្រភពព័ត៌មានពីកាសែតបាងកកប៉ុស្តិ៍ថា កិច្ចប្រជុំរដ្ឋមន្ត្រីការបរទេសអាស៊ានបានបញ្ចប់ ហើយទទួលបានលទ្ធផលគឺថា កម្ពុជា និងថៃ គួរតែបើកកិច្ចប្រជុំគណៈកម្មាធិការព្រំដែនចម្រុះ (JBC) នៅប្រទេសទី៣ ដើម្បីដោះស្រាយជម្លោះព្រំដែន ដែលចេះបន្តកើតឡើង ។
ជាមួយគ្នានេះ អាស៊ានក៏បានស្វាគមន៍ចំពោះការអញ្ជើញដោយប្រទេសកម្ពុជា និងប្រទេសថៃ ឱ្យបញ្ជូនអ្នកសង្កេតការណ៍ឥណ្ឌូណេស៊ីទៅកាន់តំបន់ព្រំដែន របស់ប្រទេសទាំងពីរ ដើម្បីពិនិត្យមើលពីការប្តេជ្ញាចិត្តរបស់ប្រទេសទាំងពីរបញ្ចៀស ការប៉ះទង្គិចគ្នាដោយអាវុធទៀត ៕
No comments:
Post a Comment