ថ្ងៃ សុក្រ ទី ១៨ ខែ កុម្ភៈ ឆ្នាំ ២០១១
(រូបថត ចាន់ថេត)
នារីមិនស្គាល់ឈ្មោះ
ខេត្តកំពង់ចាម ៖ ស្ត្រីម្នាក់ដែលមិនត្រូវបានគេស្គាល់ឈ្មោះ មានសម្បុរស អាយុប្រហែលជាង២០ឆ្នាំ មិនដឹងថា មានទីលំនៅនៅទីណាទេ បានបើករថយន្តម៉ាក RAV-4 ពណ៌ទឹកប្រាក់ មួយគ្រឿងពាក់ស្លាកលេខភ្នំពេញ 2K-9789 មកឈប់នៅអែបចិញ្ចើមថ្នល់ ហើយដើរចូលមកដេកនៅក្នុងគ្លីនិកឯកជនមួយ ស្ថិតនៅភូមិទី១០ សង្កាត់កំពង់ចាម ក្រុងកំពង់ចាម កាលពីវេលាម៉ោង៣រសៀល ថ្ងៃទី១៦ កុម្ភៈ ។ ដោយមិននិយាយស្តីរកគ្រូពេទ្យ ក៏បង្កឱ្យមានការសង្ស័យខ្លាចមានបញ្ហា ហើយម្ចាស់គ្លីនិកបានទូរស័ព្ទប្រាប់ដល់អាជ្ញាធរ និងសមត្ថកិច្ចសង្កាត់កំពង់ចាម ឱ្យមកពិនិត្យនិងបាននាំទៅសង្គ្រោះនៅមន្ទីរពេទ្យខេត្តជាបន្ទាន់ផងដែរ ។
តាមលោកឃុត រុន នាយប៉ុស្តិ៍រដ្ឋបាលសង្កាត់កំពង់ចាម និយាយថា គេមិនទាន់ដឹងថា ស្ត្រីរូបនេះជិះរថយន្តចេញមកពីកន្លែងណាទេ ដោយនៅខាងស្តាំរថយន្តផ្នែកខាងមុខមានស្លាកស្នាមក្រពឹត ដូចជាប៉ះនឹងអ្វីមួយហើយព្យាយាមបើករថយន្តមកឈប់អែបនឹងចិញ្ចើមថ្នល់រួចចូលទៅដេកលើគ្រែនៅក្នុងគ្លីនិកឯកជនមួយកន្លែងស្ថិតក្នុងភូមិ-ឃុំខាងលើ ដោយមិននិយាយស្តីអ្វីទាំងអស់ ។ លោកនាយប៉ុស្តិ៍បានបន្តថា ដោយទទួលបានបញ្ជាពីលោកវរសេនីយ៍ត្រី សំ ផាត អធិការនគរបាលក្រុងកំពង់ចាម បានចាត់ឱ្យរូបលោកដឹកនាំកំលាំងក្រោមឱវាទចុះទៅជាបន្ទាន់នៅគ្លីនិកឯកជននោះ ក៏ប្រទះឃើញស្ត្រីម្នាក់មិនស្គាល់អត្តសញ្ញាណដេកនៅក្នុងគ្លីនិកតែម្នាក់ឯង ដែលទំនងជាមាននរណាម្នាក់ឱ្យនាងផឹកថ្នាំអ្វីម្យ៉ាងហើយបានជារងគ្រោះបែបនេះ ។ លោកសន្និដ្ឋានថា ប្រហែលជានាងព្យាយាមបើករថយន្តមករកគ្រូពេទ្យឱ្យជួយសង្គ្រោះ ឬមួយក៏យ៉ាងណានោះទេ តែដោយស្ថានភាពមើលទៅមានលក្ខណៈមិនស្រួល ក៏ប្រញាប់ប្រញាល់បញ្ជូនមកកាន់មន្ទីរពេទ្យខេត្តជាបន្ទាន់ ។
តាមអ្នកគ្រូពេទ្យម្នាក់បានប្រាប់ថា ខណៈពេលមកដល់មន្ទីរពេទ្យខេត្ត ស្ត្រីរូបនេះដែលស្ថិតក្នុងអារម្មណ៍រវើរវាយនិយាយថា បុរសដែលបាននាំនាងមកនោះស្អាតរាងខ្ពស់ដោយនិយាយលើកដៃចុះឡើងៗក្នុងលក្ខណៈសប្បាយរីករាយទៀតផង ។ លោកឃុត រុន បានបញ្ជាក់ថា រហូតមកដល់វេលាម៉ោង១២ថ្ងៃត្រង់ ថ្ងៃទី១៧ កុម្ភៈ ស្ត្រីរូបនេះនៅតែមិនអាចនិយាយប្រាប់ថា «នាងមានឈ្មោះអ្វី និងទីលំនៅនៅទីណាពិតប្រាកដនៅឡើយទេ» ហើយនាងនិយាយមិនដឹងអ្វីទាំងអស់ និងកំពុងតែសំរាកនៅក្នុងមន្ទីរពេទ្យខេត្ត ។ តាមរយៈកាសែតកោះសន្តិភាព រូបលោក សូមឱ្យបងប្អូនណាដែលមានបាត់សមាជិកគ្រួសារដូចដែលបានជិះរថយន្តម៉ាកខាងលើ សូមទាក់ទងមកកាន់អធិការដ្ឋាននគរបាលក្រុងកំពង់ចាម នឹងទទួលបានព័ត៌មានបន្ថែម ៕
No comments:
Post a Comment