ថ្ងៃ ព្រហស្បតិ៍ ទី ២៤ ខែ កុម្ភៈ ឆ្នាំ ២០១១
(រូបថត ប៊ុនរី)
បុរសរងគ្រោះដោយសារចរន្តអគ្គិសនីឆក់
រាជធានីភ្នំពេញ ៖ បុរសកម្មករសំណង់ម្នាក់បានត្រូវមិត្តភក្តិដឹកតាមម៉ូតូយកមក មន្ទីរពេទ្យកាល់ម៉ែត បន្ទាប់ពីបុរសនោះត្រូវចរន្តអគ្គិសនីឆក់ពេលកំពុង កាន់ម៉ូទ័រអារឈើនៅក្នុងការដ្ឋានសំណង់មួយលើកំណាត់ផ្លូវលេខ៧០ សង្កាត់ស្រះចក ខណ្ឌដូនពេញ កាលពីវេលាម៉ោង១និង៣០នាទីរសៀលថ្ងៃទី២៣ កុម្ភៈ បណ្តាលឱ្យរងរបួសយ៉ាងធ្ងន់ធ្ងរ ។
មិត្តភក្តិជនរងគ្រោះបានឱ្យដឹងថា បុរសរងគ្រោះដោយសារចរន្តអគ្គិសនីឆក់នេះឈ្មោះស៊ុន ស៊ាប អាយុ៣១ឆ្នាំ មានស្រុកកំណើតនៅភូមិដូនដោក ឃុំជាច ស្រុកកំចាយមារ ខេត្តព្រៃវែង មករាជធានីភ្នំពេញធ្វើជាកម្មករសំណង់នៅការដ្ឋានសំណង់ខាងលើ ។ មុនពេលកើតហេតុជនរងគ្រោះបានកាន់ម៉ូទ័រអារឈើ ខណៈដែលកំពុងតែអារនោះគាត់បានយកដៃទៅកាន់ដែកបណ្តាលឱ្យឆក់ដួលប្រកាច់ សន្លប់តែម្តង ហើយក៏បង្កឱ្យមានការភ្ញាក់ផ្អើលដល់កម្មករនាំគ្នាសែងគាត់ ពីជាន់ទី១ចុះមកដីរួចលើកដាក់លើម៉ូតូបញ្ជូនទៅកាន់ មន្ទីរពេទ្យកាល់ម៉ែតដេីម្បីសង្គ្រោះជីវិត ។
តាមប្រភពព័ត៌មានឱ្យដឹងថា ជនរងគ្រោះទើបតែមកធ្វើការនៅការដ្ឋានសំណង់ខាងលើបានរយៈពេល១០ថ្ងៃប៉ុណ្ណោះ ក៏ជួបគ្រោះថ្នាក់ត្រូវចរន្តអគ្គិសនីឆក់បែបនេះ ហើយបុរសរងគ្រោះរូបនេះមានប្រពន្ធធ្វើការនៅរោងចក្រកាត់ដេរ និងមានកូនម្នាក់ផងដែរ ។ គ្រូពេទ្យបានខ្សឹបប្រាប់ឱ្យដឹងថា ជនរងគ្រោះឈ្មោះស៊ុន ស៊ាប រូបនេះកំពុងត្រូវបានសង្គ្រោះបន្ទាន់ ព្រោះត្រូវចរន្តអគ្គិសនីឆក់ខ្លាំងបណ្តាលឱ្យប៉ះពាល់ដល់បេះដូងធ្ងន់ធ្ងរ ហើយពេលនេះគ្រូពេទ្យកំពុងតែធ្វើការតាមដានបន្តទៀត ៕
No comments:
Post a Comment