ថ្ងៃ អង្គារ ទី ២២ ខែ កុម្ភៈ ឆ្នាំ ២០១១
រូបភាពពីវ៉េបសាយ
បាតុករបារ៉ែន
ក្រុមបាតុករដែលហៅខ្លួនគេថា ក្រុម «យុវជន១៤ កុម្ភៈ» បានអំពាវនាវកាលពីថ្ងៃទី២១ កុម្ភៈ ឱ្យផ្តួលរំលំគ្រួសាររាជវង្ស ដែលកាន់អំណាចនៅបារ៉ែនជាកន្លែងដែលក្នុងរយៈពេលមួយសប្តាហ៍ នៃបាតុកម្មតវ៉ាបណ្តាលឱ្យមនុស្សស្លាប់យ៉ាងតិច៨នាក់ និងជាច្រើនរយនាក់ត្រូវរបួស ។ ក្នុងបាតុកម្មមួយក្រុមនេះបានស្នើឱ្យផ្តួលរំលំរបបគាបសង្កត់ របស់គ្រួសាររាជវង្សព្រះចៅអាល់ខាលីហ្វា ដោយបញ្ជាក់ថា ប្រជាជននឹងជ្រើសរើសប្រព័ន្ធនយោបាយមួយដែលខ្លួនចង់បាន ។ បាតុកម្មនេះក៏ទាមទារផងដែរ ឱ្យមានការបោះឆ្នោតសម្រាប់ជ្រើសតាំងរដ្ឋាភិបាលមួយ ហើយឱ្យមានការកាត់ទោសពួកអ្នកទទួលខុសត្រូវ ដែលវាយប្រហារប្រឆាំងពួកបាតុករកាលពីសប្តាហ៍មុន ។
រជ្ជកាលស៊ុននីតរបស់ព្រះចៅអាល់ខាលីហ្វាកាន់ អំណាចនៅបារ៉ែន ចាប់តាំងពី២០០ឆ្នាំមកហើយ ។ប៉ុន្តែបាតុកម្មរបស់ក្រុមយុវជន១៤ កុម្ភៈ ពុំឆ្លុះបញ្ចាំងពីជំហររបស់គណបក្សប្រឆាំងមួយឡើយ ដែលគណបក្សនេះនឹងព្រមទទួលយកការរក្សាទុក រជ្ជកាលស៊ុននីតរបស់ព្រះចៅអាល់ខាលីហ្វា ជាថ្នូរនឹងការផ្ទេរផ្នែកមួយនៃអំណាចឱ្យដល់សភា ។ ម្យ៉ាងវិញទៀត លោក HASSAN MESHAIMA ជាមេដឹកនាំប្រឆាំងសំខាន់រស់នៅនីរទេសក្នុងទីក្រុងឡុងដ៍ ត្រូវវិលត្រឡប់មកប្រទេសបារ៉ែនវិញនាយប់ថ្ងៃទី២២ កុម្ភៈ ។ មេដឹកនាំប្រឆាំងរូបនេះត្រូវកាត់ទោសកំបាំងមុខនៅបារ៉ែន ។ លោកទទួលការចោទប្រកាន់ជាមួយសកម្មជនស៊ីអុីត២៤នាក់ទៀតថា រួមគំនិតដើម្បីផ្តួលរំលំរបបស្តេច ។ ការវិលត្រឡប់របស់លោកអាចធ្វើឱ្យអាជ្ញាធរស្ថិតក្នុងសភាពការណ៍ ល្អមួយ ។ ការឃុំខ្លួនលោកនឹងអាចញ៉ាំងឱ្យពួកអ្នកគាំទ្រលោកផ្ទុះ កំហឹង ហើយធ្វើស្ទះដល់ការអំពាវនាវរបស់ស្តេចឱ្យបើកការចរចាជាមួយពួក ប្រឆាំង ៕
No comments:
Post a Comment