ថ្ងៃ ច័ន្ទ ទី ២១ ខែ កុម្ភៈ ឆ្នាំ ២០១១
(រូបថត សារ៉ាយ)
កិច្ចសន្យាផ្តល់ជំនួយត្រូវបានចុះហត្ថលេខានៅស្ថានទូតជប៉ុនថ្ងៃនេះ
រាជធានីភ្នំពេញ ៖ កាលពីរសៀលថ្ងៃទី២១ កុម្ភៈ រដ្ឋាភិបាលជប៉ុនផ្តល់ថវិកាតាមរយៈគំរោងជំនួយឧបត្ថម្ភឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុនសរុបចំនួន១២៩.៦៣១ដុល្លារអាមេរិកដល់អង្គការ Terra Renaissance ។ កិច្ចសន្យាផ្តល់ជំនួយត្រូវបានចុះហត្ថលេខានៅស្ថានទូតជប៉ុនថ្ងៃនេះ ដោយលោកម៉ាសាហ៊្វូមី គូរ៉ូគី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងលោក EZUMI Tai ប្រធានគម្រោងអង្គការ Terra Renaissance ប្រចាំកម្ពុជាដើម្បីអនុវត្តគម្រោងសាងសង់អគារសាលាបឋមសិក្សាបួសសង្គ្រៀចនៅក្នុងខេត្តបាត់ដំបង។
អង្គការ Terra Renaissance នឹងអនុវត្តគម្រោងសាងសង់អគារសិក្សាចំនួន១ខ្នងមាន៦បន្ទប់ និងបំពាក់បរិក្ខារសិក្សានៅសាលាបឋមសិក្សាបួសសង្គ្រៀច ខេត្តបាត់ដំបង។ គម្រោងនេះរួមបញ្ចូលជាមួយការសាងសង់បង្គន់អនាម័យមួយមាន២បន្ទប់ អគារស្នាក់នៅចំនួន៣បន្ទប់បំពាក់ជាមួយបរិក្ខារ និងការដំឡើងបាសាំងទឹកចំនួន២ និងដងទង់ជាតិមួយផងដែរ។ តាមរយៈគម្រោងនេះ សាលាបឋមសិក្សាបួសសង្គ្រៀចនឹងអាចផ្តល់បរិស្ថាននៃការអប់រំល្អប្រសើរដល់សិស្សានុសិស្សចំនួន១៨៨នាក់ក៏ដូចជាផ្តល់ភាពសមរម្យសម្រាប់សិស្សថ្នាក់ទី៦ផងដែរ។ ជាងនេះទៅទៀត គម្រោងនេះនឹងអាចឱ្យលោកគ្រូ អ្នកគ្រូយកចិត្តទុកដាក់ក្នុងការបង្រៀនជាមួយការផ្តល់ជូននូវអគារស្នាក់នៅសម្រាប់ពួកគាត់។
ជំនួយឧបត្ថម្ភឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុនបានចាប់ផ្តើមអនុវត្តនៅប្រទេសកម្ពុជាក្នុងឆ្នាំ២០០២ ដើម្បីគាំទ្រសកម្មភាព របស់អង្គការទាំងនេះក្នុងកិច្ចខិតខំប្រឹងប្រែងដើម្បីជួយដល់ការអភិវឌ្ឍ និងស្ថាបនាប្រទេសកម្ពុជាឡើងវិញនៅតាមកំរិតមូលដ្ឋាន។ ចាប់តាំងពីឆ្នាំ២០០២ រដ្ឋាភិបាលជប៉ុនបានផ្តល់ថវិកាជាង១៣,៥លានដុល្លារអាមេរិកដល់អង្គការក្រៅរដ្ឋាភិបាលជប៉ុនដើម្បីអនុវត្តគម្រេោងចំនួន៥៩ ដែលគម្រោងទាំងនោះផ្តោតជាពិសេសលើវិស័យអប់រំកម្រិតបឋម សុខាភិបាល និងការកំទេចយុទ្ធភ័ណ្ឌមិនទាន់ផ្ទុះ។គម្រោងដែលផ្តល់ដល់អង្គការ Terra Renais sance នាពេលនេះជាគម្រោងជំនួយលើកទី៦ ក្រោមគ្រោងការណ៍នៃជំនួយឥតសំណងសម្រាប់ឆ្នាំសារពើពន្ធឆ្នាំ២០១០របស់ជប៉ុន(មេសា ២០១០-មីនា២០១១) ៕
No comments:
Post a Comment