ថ្ងៃ ច័ន្ទ ទី ២១ ខែ កុម្ភៈ ឆ្នាំ ២០១១
ខេត្តកំពង់ចាម ៖ រថយន្តបែន១គ្រឿងចំណុះ២,៥តោន ពាក់ស្លាកលេខកំពង់ចាម៣A-១៥២៥ ដឹកអាចម៍រណារពេញបានក្រឡាប់ចូលទៅក្នុងបរិវេណស្ថានីយប្រេងកាល់តិច ក្បាលស្ពានគីហ្ស៊ុណា ស្ថិតនៅភូមិទី៣ សង្កាត់វាលវង់ ក្រុងកំពង់ចាម កាលពីវេលាម៉ោង៩ និង៤០នាទីព្រឹកថ្ងៃទី២១ កុម្ភៈ ព្រមទាំងធ្វើឱ្យមនុស្សគ្រប់គ្នារន្ធត់ ព្រោះតែនឹកស្មានថាបង្កឱ្យមានមនុស្សស្លាប់ដោយសារតែឧប្បត្តិហេតុនេះ។
លោកស៊ាម យូសេង ប្រធាននគរបាលចរាចរក្រុងកំពង់ចាមប្រាប់ឱ្យដឹងថា ក្នុងហេតុការណ៍មិនមានអ្នកណាម្នាក់រងគ្រោះថ្នាក់ទេ ព្រោះពេលឃើញរថយន្ត មិនស្រួល អ្នកដំណើរនាំគ្នារត់គេចចេញតែរៀងខ្លួន ។ រថយន្តបានជ្រុលទៅបុកទុយោដែកបំពង់ទីបបណ្តាលឱ្យកោង រួចក្រឡាប់ដេកទៅខាងស្តាំដៃលើសួន។ បន្ទាប់មកគេឃើញអ្នកបើកបររថយន្ត និងមនុស្ស៣នាក់ទៀតនាំគ្នាវារចេញពីក្នុងកាប៊ីន ដោយមិនរងរបួសទេ ។
អ្នកបើកបរឈ្មោះសុខ សំណាង ភេទប្រុស អាយុ៣៧ឆ្នាំ រស់នៅភូមិខ្វិតធំ ឃុំខ្វិតធំ ស្រុកព្រៃឈរ ប្រាប់ថា លោកបើករថយន្តដឹកអាចម៍រណារចេញមកពីស្រុកពញាក្រែកឆ្ពោះទៅកាន់ស្រុកព្រៃឈរដើម្បីលក់ឱ្យអ្នកធ្វើស្ករត្នោតដុតរំងាស់ស្ករ។ ពេលរថយន្តបើកដល់លើស្ពានគីហ្ស៊ុណាត្រង់ចំណោតចុះទៅត្រើយខាងលិច ស្រាប់តែចាប់ហ្វ្រាំងមិនស៊ីសោះ ព្រោះតែបែកកាប៉ែនហ្វ្រាំង។ ក្នុងស្ថានភាពបែបនេះលោកប្រឹងបញ្ជាចង្កូតរថយន្តមិនឱ្យទៅបុកអ្នកណាម្នាក់ទេ។
អ្នកបើករថយន្តបានបញ្ជាក់ថា ដោយសារតែនៅខាងមុខមានរង្វង់មូលក្បាលស្ពាននោះលោកប្រឹងកាច់ចង្កូតទៅខាងស្តាំដៃចូលទៅក្នុងស្ថានីយចាក់ប្រេងកាល់តិច ប៉ុន្តែប្រឹងកាច់ចង្កូតមិនឱ្យទៅបុកកន្លែងចាក់ប្រេងទេ ព្រោះខ្លាចកើតមានអគ្គីភ័យ។ រថយន្តបានបុកទុយោបំពង់ទីប ហើយក្រឡាប់ទៅខាងស្តាំដៃជះអាចម៍រណារចោលតែម្រង។
ក្នុងឧប្បតិ្តហេតុនេះមនុស្ស៣នាក់ដែលរួមដំណើរនៅក្នុងកាប៊ីនមិនរងរបួសទេ ចំណែករូបលោកជាអ្នកបើកបរប៉ះទង្គិចទ្រូងទៅនឹងចង្កូតរថយន្តបណ្តាលឱ្យឈឺចាប់បន្តិចបន្តួច ។ លោកស៊ាម យូសេង បញ្ជាក់ថា ការខូចខាតដែកបំពង់ទីបសំរាប់បង្ហូរប្រេងនោះត្រូវភាគីម្ចាស់រថយន្តព្រមទទួលសងឱ្យទៅម្ចាស់ស្ថានីយប្រេងកាល់តិចចំនួន២៥០ដុល្លារដើម្បីបញ្ចប់ការប្តឹងប្តល់៕
No comments:
Post a Comment