ថ្ងៃ អាទិត្យ ទី ១៣ ខែ កុម្ភៈ ឆ្នាំ ២០១១
(រូបថត បាវិត)
បាញ់សំលាប់ខ្លួនដើម្បីបញ្ជាក់ពីចិត្តស្មោះឱ្យភរិយាឈប់ប្រច័ណ្ឌ
ខេត្តស្វាយរៀង ៖ នាយទាហាន ឋានៈអនុសេនីយ៍ឯកមួយរូបសំរេចចិត្តយកកាំភ្លើងខ្លីបាញ់ចំប្រហោងត្រចៀកខាងស្តាំស្លាប់ភ្លាមៗ ដើម្បីបញ្ជាក់ពីចិត្តស្មោះចំពោះភរិយាកុំឱ្យប្រច័ណ្ឌតទៅទៀត។ ហេតុការណ៍ដ៏រន្ធត់នេះបានកើតឡើងកាលពីថ្ងៃទី១២ កុម្ភៈ វេលាម៉ោង៧និង៣០នាទីយប់ នៅភូមិវាលយន្ត សង្កាត់ស្វាយរៀង ក្រុងស្វាយរៀង។
តាមប្រភពពីមន្ត្រីសមត្ថកិច្ចបានឱ្យដឹងថា នាយទាហានរូបនេះឈ្មោះទេព និវត្ត អាយុ៣៦ឆ្នាំ ឋានៈជាអនុសេនីយ៍ឯក កងវិស្វកម្មអគ្គសេនាធិការកងទ័ពជាតិ មានទីលំនៅភូមិស្វាយរៀង សង្កាត់ស្វាយរៀង ក្រុងស្វាយរៀង មានកូនស្រី២នាក់ ។ ប្រភពដដែលបញ្ជាក់ថា នៅវេលាម៉ោង៥ល្ងាច នាយទាហានរូបនេះបានបើករថយន្តម៉ាកឡិចស៊ីសកូនកាត់មួយគ្រឿងចូលទៅផឹកស៊ីនៅហាងតន្ត្រីរតនានៅទំនប់តាណេង ភូមិមេភ្លើង សង្កាត់ស្វាយរៀង រហូតដល់ម៉ោងប្រមាណជាង៧យប់ គេឃើញវត្តមានស្ត្រីជាភរិយាចូលទៅរួចក៏ហៅប្តីជានាយទាហានរូបនេះ ឱ្យត្រឡប់ទៅផ្ទះវិញ ហើយក៏ព្រមវិលត្រឡប់ទៅផ្ទះ ជាមួយភរិយានាពេលនោះ។ លុះទៅដល់ផ្ទះដាក់ប្រពន្ធចុះ រួចក៏យករថយន្តឡិចស៊ីស ទៅទុកនៅផ្ទះរបស់ម្តាយនៅភូមិវាលយន្ត។ ប្រភពដដែលបន្តថា ពេលនាយទាហាននេះចុះពីរថយន្តក៏ឈរផ្អែកនឹងរថយន្ត ស្រាប់តែដកភ្លើងខ្លី K54 ពីចង្កេះបាញ់ខ្លួនឯងចំប្រហោងត្រចៀកខាងស្តាំ ចូលគ្រាប់ក្នុងក្បាល ហូរឈាមបាចក្រហមច្រាលពេញជញ្ជាំងរថយន្ត ហើយក៏ត្រូវក្រុមគ្រួសារដឹកទៅកាន់មន្ទីរពេទ្យខេត្ត ដើម្បីសង្គ្រោះតែគ្រូពេទ្យនិយាយថា ធ្លាយដល់ខួរស្លាប់បាត់ទៅហើយ ។
បើតាមប្រភពពីអ្នកជិតខាងនិយាយថា គូស្វាមីភរិយាមួយគូនេះតែងតែមានជម្លោះដោយសារតែការប្រច័ណ្ឌជារឿយៗ ។ នៅថ្ងៃកើតហេតុស្ត្រីជាភរិយាបានទៅប្តឹងលោកចៅសង្កាត់សុំឱ្យប្តីធ្វើកិច្ចសន្យាឈប់ដើរលេងផឹកស៊ី និងមានស្រី តែលោកមេឃុំ ពុំបានហៅតាមពាក្យបណ្តឹងរបស់ស្ត្រីជាភរិយាទេ ដោយយល់ឃើញថាជារឿងមិនពិត។ លុះល្ងាចឡើងបុរសជាប្តីតូចចិត្តក៏ទៅផឹកស៊ីនៅក្នុងហាង ហើយពេលកំពុងតែអង្គុយផឹកស៊ីមានអ្នកចំរៀងអង្គុយជជែកលេង «អង្គុយកំដរ» ស្រាប់តែស្ត្រីជាប្រពន្ធចូលទៅដល់ក៏មានជម្លោះកើតឡើងដោយស្ត្រីជាប្រពន្ធឡូឡានៅមុខប្តីមុខភ្ញៀវ និងពួកនាង។ ទំនងជាប្តីមានការខ្មាសគេក៏ដើរចេញទាំងទឹកមុខក្រៀមក្រំក្រោយមកឮថា បានបាញ់សំលាប់ខ្លួនឯង ការពិតគឺគ្មានស្រីឯណាទេ ៕
No comments:
Post a Comment